एजेन्सी – मलेसियाले एसिया प्यासेफिक क्रिकेट च्याम्पियन्स ट्रफीको उपाधि जितेको छ।

सिंगापुरमा भएको फाइनल हङकङलाई १० विकेटले हराउँदै मलेसियाले उपाधि जितेको हो। वर्षाले प्रभावित खेल ५ ओभरको मात्र भएको थियो ।

५३ रनको लक्ष्य मलेसियाले २.२ ओभरमा कुनै विकेट नगुमाई पूरा गर्यो । मलेसियालाई जित दिलाउन ओपनरद्वय कप्तान साइद अजिज र अस्लाम खान अविजित रहे ।

कप्तान अजिज ९ बलमा १ चौका र ५ छक्काको सहयोगमा ३६ रन जोडे । खान ५ बलमा ३ चौका र १ छक्काको सहयोगमा १८ रन बनाए । हङकङले ३ बलर मात्र प्रयोग गरेको थियो ।

त्यसअघि सिंगापुर नेशनल क्रिकेट मैदानमा टस हारेर पहिला ब्याटिङ गरेको हङकङले ५ ओभरमा ४ विकेट गुमाएर ५२ रन बनायो।

अंशुमन रथले १२ बलमा ३ चौका र १ छक्काको सहयोगमा सर्वाधिक २७ रन जोडे । ओपनर जिशान अलि ६ बलमा १ चौका र १ छक्काको सहयोगमा ११ रनमा आउट भए ।

मलेसियाका लागि विरनदिप सिंहले २ तथा विजय उन्नीले १ विकेट लिए । ४ टोलीको सहभागिता रहेको प्रतियोगिता डबल राउन्ड रोबिनमा भएको थियो ।

लिग चरणको शीर्ष स्थानमा रहेर हङकङ र मलेसियाले फाइनल खेलेका हुन् । प्रतियोगितामा सिंगापुर र समोअ पनि सहभागी थिए ।

मलेसिया र समोअ आगामी अक्टोबरमा ओमानमा हुने टि ट्वान्टी आई विश्वकप एसिया तथा एसिया प्यासेफिक छनोटमा सहभागी हुनेछन् । हङकङले सेप्टेम्बरमा हुने एसिया कपमा भाग लिनेछ ।