एजेन्सी – इङ्ग्ल्याण्डमा जारी वर्ल्ड च्याम्पियनसिप लिजेन्ड्समा इण्डियन च्याम्पियन्सले लगातार दोस्रो हार बेहोरेको छ ।

हेडिङ्लीमा शनिवार इण्डियनलाई अस्ट्रेलिया च्याम्पियन्सले ४ विकेटले पराजित गर्यो । पाकिस्तान च्याम्पियन्ससँगको पहिलो खेल खेल्न अस्विकार गरेको इण्डियनले त्यसपछि दुई खेलमा हार बेहोरेको हो ।

२ सय ३ रनको लक्ष्य अस्ट्रेलियाले निर्धारित २० ओभरको १ बल बाँकी रहँदा पूरा गर्यो ।

अस्ट्रेलियाका कलुम फर्गुसनले ३८ बलमा ५ चौका र ४ छक्काको सहयोगमा अविजित ७० रनको अर्धशतकीय इनिङ खेले । डान क्रिस्टियन ३९, क्रिस लिन २५, बेन कटिङ १५ तथा शन मार्श ११ रनमा आउट भए ।

इण्डियनका लागि पियुष चावलाले ३, हरभजन र्सिहले २ तथा विनय कुमारले १ विकेट लिए ।

त्यसअघि टस हारेर ब्याटिङको निम्तो पाएको इण्डियन्सले निर्धारित २० ओभरमा ४ विकेट गुमाएर २ सय ३ रन बनाएको थियो ।

इण्डियनका लागि ओपनर शिखर धवनले ६० बलमा १२ चौका र १ छक्काको सहयोगमा ९१ रनको योगदान गरे ।

युसुफ पठान २३ बलमा ३ चौका र ४ छक्काको सहयोगमा ५२ रनमा अविजित रहे । ओपनर रोबिन उथप्पा २१ बलमा ३७ तथा सुरेश रैना ११ रनमा आउट भए ।

अस्ट्रेलियाका लागि डान क्रिस्टियनले २ तथा डार्सि शर्टले १ विकेट लिए । खेलेको ३ मध्ये २ मा जित तथा १ मा हार सहित ५ अंक भएको अस्टेलिया दोस्रो स्थानमा उक्लिएको छ । अंक विहिन इण्डियन्स पुछारमा छ ।

प्रतियोगितामा अन्तर्राष्ट्रिय क्रिकेटबाट सन्यास लिएका क्रिकेटरको सहभागिता छ। प्रतियोगितामा ६ टोलीको सहभागी छन् ।

राउण्ड रोबिन लिगका आधारमा हुने प्रतियोगिताको शीर्ष ४ टोली सेमिफाइनलमा पुग्नेछन् । प्रतियोगिताको फाइनल अगस्ट २ मा हुनेछ ।