एजेन्सी – इङ्ल्यान्डविरुद्धको चौथो टेस्टको पाँचौं तथा अन्तिम दिनको खेल बाँकी रहँदा भारत १ सय ३७ ले पछाडि छ।

म्यानचेस्टर भारतले दोस्रो इनिङमा २ विकेटको क्षतिमा १ सय ७४ रन बनाउँदा शनिवार चौथो दिनको खेल समाप्त भएको थियो।

पहिलो ओभरमा नै २ विकेट गुमाएर संकटमा परेको टोलीका कप्तान शुभमन गिल र केएल राहुलले इनिङ सम्हालेका थिए। उनीहरुले तेस्रो विकेटका लागि १ सय ७४ रनको अविजित साझेदारी गरेका छन् ।

केएल ८७ र गिल ७८ रनमा अविजित छन् । भारतले पहिलो इनिङमा ३ सय ५८ रन बनाएको थियो ।

जवाफमा इङ्ग्ल्याण्डले पहिलो इनिङमा सानदार ब्याटिङ गर्दै ६ सय ६९ रन बनाएको थियो। कप्तान बेन स्टोक्स र जो रुटको शतक बनाएपछि टोलीले पहिलो इनिङमा ३ सय ११ रनको अग्रता लिएको थियो।

पूर्व कप्तान रुट १४ चौकाको सहयोगमा १ सय ५० रन बनाएका थिए । ३८औं शतकसँगै रुट टेस्ट क्रिकेटको इतिहासमा सर्वाधिक रन बनाउँने दोस्रो ब्याटर बने । शीर्ष स्थानमा भारतका सचिन तेन्दुल्कर छन् ।

कप्तान स्टोक्सले ११ चौका र ३ छक्काको सहयोगमा १ सय ४१ रन जोडे । स्टोक्स टेस्ट क्रिकेटको इतिहासमा इङ्ग्ल्याण्डका लागि शतक सहित ५ विकेट लिने पहिलो कप्तान र विश्वका पाँचौं खेलाडी बने ।

यसअघि सन् १९८३ मा पाकिस्तानका कप्तान इमरान खानले भारतविरुद्ध एकै इनिङमा शतक र ५ विकेट लिएका थिए ।

ओली पोप र रुटले तेस्रो विकेटका लागि १ सय ४४ रनको साझेदारी गरे । पोप ७१ रन बनाए । इङ्ल्याण्डका लागि दुई ओपनर ज्याक क्रली र बेन डकेटले अर्धशतकीय इनिङ खेले । डकेटले ९४ रन जोडे ।

डकेट र क्रलीले पहिलो विकेटका लागि १ सय ६६ रनको साझेदारी गरे । क्रलीले ८४ रन बनाए । बायडन कार्स ४७ र लियम डसन २६ रनमा आउट भए ।

भारतका लागि रविन्द्र जडेजाले ४, जसप्रित बुमराह र वासिंटन सुन्दरले समान २ तथा अंशुल कम्बोज र मोहम्मद सिराजले समान १ विकेट लिए ।