एजेन्सी – ओपनर कमरान अकमलको शतकमा पाकिस्तान च्याम्पियन्सले इङ्ग्ल्याण्डमा जारी वर्ल्ड च्याम्पियनसिप अफ लिजेन्ड्समा लगातार तेस्रो जित निकालेको छ ।

हेडिङ्लिमा शनिवार पाकिस्तानले वेस्ट इण्डिज च्याम्पियन्सलाई ४९ रनले पराजित गरेको हो । २ सय १ रनको लक्ष्य पछ्याएको वेस्ट इण्डिजले २० ओभरमा ७ विकेट गुमाएर १ सय ५१ रन मात्र बनाउन सक्यो ।

वेस्ट इण्डिज च्याम्पियन्सका चाडविक वाल्टनले ३० बलमा ५ छक्कासहित सर्वाधिक ४२ रन जोडे । विलियम पार्किन्स २६ बलमा ३० रन बनाए । ड्बेन ब्राबो २१ बलमा २ चौका र २ छक्कासहित अविजित ३० रन जोडे।

पाकिस्तान च्याम्पियन्सका रुममन रिजले ३ तथा अमिर यामिन र सोहेल तन्विरले समान २ विकेट लिए ।

त्यसअघि टस जितेर पहिले ब्याटिङ गरेको पाकिस्तान च्याम्पियन्सलले निर्धारित २० ओभरमा ४ विकेट गुमाएर २ सय रन बनाएको थियो ।

ओपनर अकमलले ६२ बलमा १३ चौका र ५ छक्काको सहयोगमा १ सय १३ रनको शतकीय इनिङ खेले ।कप्तान मोहम्मद हफिज १८ बलमा २ चौकाको सहयोगमा २३ रन जोडे ।

ओपनर शर्जिल खान १४ बलमा २ चौका र १ छक्काको सहयोगमा २१ रन बनाए । वेस्ट इण्डिज च्याम्पियन्सका ड्बेन ब्राबो, अश्ली नर्स, डभी मोहम्मद र किरन पोलार्डले समान १ विकेट लिए ।

खेलेको तीनै खेलमा जित निकालेको पाकिस्तान च्याम्पियन्स ६ अंकका साथ तालिकाको दोस्रो स्थानमा छ । ३ मध्ये १ खेलमा जित हात पारेको वेस्ट इण्डिज च्याम्पियन्स अंक तालिकाको चौथो स्थानमा छ ।

प्रतियोगितामा अन्तर्राष्ट्रिय क्रिकेटबाट सन्यास लिएका क्रिकेटरको सहभागिता छ। प्रतियोगितामा ६ टोलीको सहभागी छन् ।

राउण्ड रोबिन लिगका आधारमा हुने प्रतियोगिताको शीर्ष ४ टोली सेमिफाइनलमा पुग्नेछन् । प्रतियोगिताको फाइनल अगस्ट २ मा हुनेछ ।