काठमाडौं (हाम्रो खेलकुद) – सुदूरपश्चिम रोयल्सले नेपाल प्रिमियर लिग (एनपिएल) को दोस्रो संस्करणका लागि मार्भल टेक्नोप्लास्ट प्रालिसँग एक्सिलेन्स पार्टनरको रुपमा सम्झौता गरेको छ ।

मार्भलका उपाध्यक्ष पवनकुमार सान्चेती र सुदूरपश्चिमका प्रमुख कार्यकारी अधिकृत प्रकाश खड्काले सोमवार सम्झौतामा हस्ताक्षर गरेका छन् । विज्ञप्तीमार्फत भनेको छ ।

‘हामी सुदूरपश्चिमसँग सहकार्य गर्न पाउँदा उत्साहित छौँ । क्रिकेटले नेपालभर लाखौँ मानिसलाई जोड्ने काम गर्छ । हामीलाई नयाँ प्रतिभालाई साथ दिन र नेपालको खेलप्रेमी समुदायसँग अझ गहिरो सम्बन्ध स्थापित गर्न पाउनु गौरवको विषय हो,’ मार्भलका उपाध्यक्ष पवनकुमार भने,’ हामी यस सिजन उत्साहपूर्ण खेल प्रदर्शनको प्रतीक्षा गर्दैछौँ, साथै सुदूरपश्चिमलाई मैदानभित्र र बाहिर सफलताको शुभकामना व्यक्त गर्दछौँ।’

‘पवन सरले विगतदेखि नै क्रिकेटलाई निरन्तर साथ दिँदै आउनुभएको छ। मार्भल जस्तो प्रतिष्ठित ब्रान्डसँग सहकार्य गर्न पाउनु हाम्रो लागि सम्मानको विषय हो। उहाँको यो सहभागिताले एनपिएललाई अझ उचाइमा पुर्‍याउनेछ, र थप व्यवसायिक संस्थाहरूलाई खेल क्षेत्रमा लगानी गर्न प्रेरणा दिनेछ,’ सुदूरपश्चिमका सिइओ खड्काले भने, ‘नेपालको नम्बर एक पाइप कम्पनी मार्भल र ठूलो समर्थक समुदाय भएको हाम्रो फ्रेन्चाइजबीचको यो सहकार्य निकै उपयुक्त भएको छ।’