एजेन्सी – इण्डियन च्याम्पियन इङ्ग्ल्याण्डमा जारी वर्ल्ड च्याम्पियनसिप अफ लिजेन्डको सेमिफाइनलमा प्रवेश गरेको छ ।

लिग चरणको अन्तिम खेलमा मंगलवार वेस्ट इण्डिज च्याम्पियन्सलाई ५ विकेटले पराजित गर्दै इण्डियन च्याम्पियन्स सेमिफाइनल पुगेको हो ।

१ सय ४५ रनको लक्ष्य भारतले १३.२ ओभरमा ५ विकेट गुमाएर पूरा गर्यो । सेमिफाइनल पुग्नको लागि १४.१ ओभरमा जित निकाल्नु पर्ने समिकरणमा थियो । इण्डियन च्याम्पियन्सले ५ बल अगावै जित निकाले थियो ।

स्टुअर्ट बिन्नीले २१ बलमा ३ चौका र ४ छक्काको सहयोगमा अविजित रुपमा सर्वाधिक ५० रनको अर्धशतकीय इनिङ खेले ।

कप्तान युवराज सिंह ११ बलमा २ चौका र १ छक्काको सहयोगमा २१ रन बनाए । युसुफ पठान ७ बलमा २१ रनमा अविजित रहँदा ओपनर शिखर धवन १८ बलमा २५ रन जोडे।

वेस्ट इण्डिज च्याम्पियन्सका ड्वेन स्मिथ र ड्वेन ब्राबोले समान २ तथा शेल्डन कट्रेलले १ विकेट लिए ।

त्यसअघि लेस्टरमा टस हारेर ब्याटिङको निम्तो पाएको वेस्ट इण्डिजले ९ विकेट गुमाएर १ सय ४४ रन बनायो ।

किरन पोलार्डले ४३ बलमा ३ चौका र ८ छक्काको सहयोगमा अविजित रुपमा ७४ रनको अर्धशतकीय इनिङ खेले ।

ड्वेन स्मिथ २१ बलमा १ चौका र १ छक्काको सहयोगमा २० रन बनाए । वेस्ट इण्डिजका अन्य ब्याटरले दोहोरो अंकमा रन बनाउँन सकेनन् ।

इण्डियन्स च्याम्पियन्सका पियुष चावलाले ३, बरुण आरोन र स्टुअर्ट बिन्नीले समान २ तथा पवन नेगीले १ विकेट लिए ।

योसँगै प्रतियोगिताको सेमिफाइनल समीकरण पूरा भएको छ । पाकिस्तान च्याम्पियन्स, दक्षिण अफ्रिका च्याम्पियन्स, अस्ट्रेलिया च्याम्पियन्स र इण्डियन च्याम्पियन्सले सेमिफाइनलमा पुगेका छन् ।

अब पहिलो सेमिफाइनलमा इण्डियन्स र पाकिस्तान तथा दोस्रो सेमिफाइनलमा दक्षिण अफ्रिका र अस्ट्रेलिया च्याम्पियन्स खेल्नेछन् । दुबै सेमिफाइनलका बिहिवार हुनेछ । फाइनल २ अगस्टमा हुनेछ ।