एजेन्सी – अफगानिस्तानका क्रिकेटर उस्मान घानीले एक ओभरमा ४५ रन बनाएका छन् ।

घानीले इङ्ग्ल्याण्डमा जारी इसिएस टि टेन प्रतियोगिताको क्रममा एकै ओभरमा ४५ रन बनाएका हुन् ।

रानिस पार्क स्पोर्टस् मैदान विनबल्डनमा शुक्रवार भएको खेलमा लण्डन काउन्टी क्लबका कप्तान घानीले गिल्डफोर्ड क्रिकेट क्लबविरुद्ध यो सफलता प्राप्त गरेका हुन् ।

घानीले विल आर्नीको आठौं ओभरमा ४५ रन प्रहार गरेका हुन् । आठौं ओभरको पहिलो बलमा नो-बल सहित घानीले छक्का प्रहार गरे । त्यसपछिको फ्रि-हिटमा घानीले छक्का प्रहार गरे ।

ओभरको दोस्रो बलमा वाइडमा चौका प्रहार गरे । त्यसपछिको अर्को बलमा छक्का प्रहार गरे । तेस्रो बलमा फेरि भएको नो-बलमा घानीले चौका प्रहार गरे । त्यसपछिको फ्रि-हिटमा घानीले फेरि छक्का प्रहार गरे ।

चौथो बलमा डट राखेका आर्नीले पाँचौ बलमा छक्का प्रहार गरे । ओभरको अन्तिम बलमा चौका सहित घानीले एकै ओभरमा ४५ रन बनाए । यस खेलमा घानीले ४३ बलमा ११ चौका र १७ छक्का सहित अविजित १ सय ५३ रन प्रहार गरे ।

घानीले १४ बलमा अर्धशतक तथा २८ बलमा शतक पूरा गरेका थिए । घानीको विष्फोटक इनिङको सहयोगमा लण्डनले यस खेल ७१ रनको फराकिलो अन्तरले जितेको थियो ।

२८ वर्षिय घानीले अफगानिस्तानका लागि १७ ओडिआई तथा ३५ टि ट्वान्टी आई खेलेका छन् ।