एजेन्सी – भारतविरुद्ध पाँचौ तथा अन्तिम टेस्टमा इङ्ग्ल्याण्ड जितको नजिक पुगेको छ।

ओभलमा जारी टेस्टमा चौथो दिनमै नतिजा आउने अवस्था थियो । तर, खराब मौसमका कारण चौथो दिनको आइतवारको खेल समाप्त भयो । नतिजाका लागि पाँचौं तथा अन्तिम दिन कुर्नु पर्ने भएको छ ।

३ सय ७४ रनको लक्ष्य पछ्याइरहेको घरेलु टोलीले ६ विकेट गुमाएर ३ सय ३९ रन बनाएको छ । घरेलु टोलीलाई पाँचौ दिन जितका लागि ३५ रन जोडे पुग्छ। टोलीको ४ विकेट बाँकी छ ।

भारतले जित निकाल्न ४ विकेट लिनु पर्ने हुन्छ । दोस्रो इनिङमा घरेलु टोलीका लागि जो रुट र ह्यारी ब्रुकले शतकीय पारी खेले ।

ब्रुकले १४ चौका र २ छक्कासहित १ सय ११ रन बनाए । रुटले १२ चौकाका साथमा १ सय ५ रन जोडे । ओपनर बेन डकेट ५४, कप्तान ओली पोप २७ र ज्याक क्रली १४ रनमा आउट भए ।

भारतका लागि प्रसिद्ध कृष्णाले ३, मोहम्मद सिराजले २ तथा आकाश दिपले १ विकेट लिए ।

पाँचौ दिनमा घरेलु टोलीले लक्ष्य पूरा गरे उसको टेस्ट इतिहासको दोस्रो ठूलो लक्ष्य पछ्याउँदै जित निकाल्ने छ । त्यो अवस्थामा इङ्ग्ल्याण्डले ३-१ ले टेस्ट सिरिज जित्नेछ। इङ्ग्ल्याण्डले भारतविरुद्ध नै सन् २०२२ मा ३ सय ७८ रनको लक्ष्य पूरा गरेको थियो ।

पहिलो इनिङमा २३ रनले पछि परेको भारतले दोस्रो इनिङमा ३ सय ९६ रन जोडेर ३ सय ७३ रनको अग्रता लिएको थियो ।

त्यसअघि टस हारेर ब्याटिङको निम्तो पाएको भारत पहिलो इनिङमा २ सय २४ रन बनाएको थियो । घरेलु टोलीले पहिलो इनिङमा २ सय ४७ रन जोडेको थियो। ५ टेस्टको सिरिजमा इङ्ग्ल्याण्ड २-१ ले अघि छ ।