काठमाडौं (हाम्रो खेलकुद) – दोस्रो संस्करणको नेपाल प्रिमियर लिग (एनपिएल) को खेलाडी छनोटका लागि हुने अक्सनको ‘बी’ श्रेणीमा लेग स्पिनर युवराज खत्री सहितका ३५ क्रिकेटरले स्थान बनाएका छन् ।

नेपाल प्रिमियर लिग (एनपिएल) ले बुधवार अक्सनमा सहभागी रहने १ सय ५० जना खेलाडीको अन्तिम सुची घोषणा गरेको हो । सुचीमा यु-१९ टोलीका महत्वपूर्ण सदस्य रहेका युवा क्रिकेटर युवराजले समेत स्थान बनाएका हुन् ।

युवराजले भखरै राष्ट्रिय टोलीको प्रारम्भिक टोलीमा रहेर भारतको एनसिएमा अभ्यास गरेर फर्किएका थिए । उनीसँगै ‘बी’ श्रेणीमा रहेका अन्य खेलाडीमा गत संस्करण खेलेका तथा नखेलेका खेलाडी रहेका छन् ।

सुचीमा गत संस्करण लुम्बिनी लायन्सबाट खेलेका दुर्गेश गुप्ता र आशुतोष घिरैया रहँदा पोखरा एभेन्जर्सबाट खेलेका हरिशंकर साह र नारायण जोशी रहेका छन् । हरिशंकरले सुनम गौतमको स्थानमा पोखराबाट खेलेका लिएका थिए ।

त्यस्तै, पहिलो संस्करण कर्णाली याक्सबाट खेलेका मौषम ढकाल, भुवन कार्की र रित गौतम तथा चितवन राइनोजबाट खेलेका सन्तोष कार्की, विपिन रावल र दिपेश श्रेष्ठ समेत सुचीमा रहेका छन् ।

पहिलो संस्करणमा विराटनगर किंग्सबाट खेलेका अनिल खरेल, दिपक बोहोरा तथा काठमाडौं गोर्खाजबाट खेलेका शंकर राना, कृष्ण कार्की र सुमित महर्जन सुचीमा अटाएका छन् । जनकपुर बोल्ट्सबाट खेलेका हेमन्त धामी, शेर मल्ल, आकाश त्रिपाटी तथा सुदुरपश्चिमबाट खेलेका खडक बोहोरा, अर्जुन कुमाल, बसन्त खत्री सुचीमा रहेका छन् ।

पहिलो संस्करण नखेलेका युवराज, विशाल विक्रम केसी, सन्तोष यादव, पृथु बास्कोटा आदि श्रेणी ‘बी’ मा रहेका छन् ।

आगामी शनिवार हुने अक्सनमा श्रेणी ‘बी’ मा २३ खेलाडीको मात्र आवश्यकता छ । तर, दोस्रो चरणको अक्सनमा ‘बी’ श्रेणीमा बोली नलागेका खेलाडी स्वतः ‘सी’ श्रेणीमा झर्ने छन् । र, ‘बी’ का खेलाडीलाई ‘सी’ श्रेणीका रुपमा पनि बोली लगाउन मिल्नेछ ।

एनपिएल अक्सनका लागि ४ सय ५८ जनाले आफ्नो नाम रजिस्ट्रेसन गराएमा १ सय ५० खेलाडी अन्तिम सुचीमा अटाएका छन् । एनपिएलमा सहभागी ८ टोलीले इच्छाएका तथा नेपाल क्रिकेट संघ (क्यान) को प्राविधिक टोलीले बनाएको मापदण्डमा रहेका १ सय ५० खेलाडीलाई अन्तिम सुचीमा समावेश गरिएको हो ।

१ सय ५० जना खेलाडीले अन्तिम सुचीमा आफुलाई पाए पनि जम्मा ३७ खेलाडीमा मात्र बोली लाग्नेछ । एनपिएलको पहिलो संस्करणको अक्सनबाट ८८ खेलाडी (मार्की समेत) विभिन्न टोलीमा संलग्न भएका थिए । पहिलो संस्करणको अक्सनमा बोली लागेका ८८ खेलाडीमध्ये टोलीले दोस्रो संस्करणका लागि ५१ (मार्की समेत) खेलाडीलाई निरन्तरता दिएका छन् ।

कुन श्रेणीमा कति खेलाडी आवश्यक

श्रेणी ‘ए’ – ४
श्रेणी ‘बी’ – २३
श्रेणी ‘सी’ – १०
जम्मा – ३७

न्युनतम र अधिकतम मुल्य

श्रेणी ‘ए’ न्युनतम १० लाख – अधिकतम १५ लाख
श्रेणी ‘बी’ न्युनतम ५ लाख – अधिकतम १० लाख
श्रेणी ‘सी’ न्युनतम २ लाख – अधिकतम ५ लाख