काठमाडौं (हाम्रो खेलकुद)- नेपाल ‘ए’ ले टि-ट्वान्टी सिरिजमा तेस्रो खेलमा आसामलाई ९ रनले हराएको छ। यो जितमा नेपालले सिरिजमा २-१ को अग्रता बनायो।

जितको लागि १ सय ९७ रनको लक्ष्य पछाएको आसाम २० ओभरमा १० विकेट गुमाउँदै १ सय ८७ रनमा समेटियो।

आसामको लागि निहार डेकाले सर्वाधिक ४० रन र सुमित घाडीगसओनकरले ३६ रन बनाए। साहिल जैनले २४ रन र शिवांशकर रोएले ११ रनमा आउट भए।

यसपछि नवौं क्रमका अब्दुद अजिज कुरेशीले नेपाली बलरलाई केहि दबाब दिए। १७ बलमा अविजित ३१ रन बनाए। तर पनि टोलीलाई जित दिलाउन सकेनन्। अन्य ५ ब्याटरले‌ दोहोरो रन छुन सकेनन्।

बलिङमा विवेक यादवले ४ ओभर बलिङ गर्दै १७ रन दिएर ३ विकेट लिए। बसिर अहमदले ३ ओभरमा १४ रन खर्चेर ४ विकेट झारे। यस्तै कमल सिंह ऐरी र आकाश चन्दले समान २ विकेट लिएका थिए।

त्यसअघि पहिले ब्याटिङ गरेको नेपालले २० ओभरमा ६ विकेट गुमाउँदै १ सय ९६ रनको ठुलो योगफल बनायो। सन्दीप जोराले उत्कृष्ट ब्याटिङ गरे। उनले ४८ बल खेल्दै ६ चौका र ४ छक्का प्रहार गर्दै ७४ रनको पारी खेले। उनी रन आउट भए।

आदिल अलाम अन्सारीले १६ बलमा ४ छक्का र १ चौका सहित ३५ रन बनाए। त्रित राज दासले ३३ रन र कप्तान अनिल शाहले ३१ रन जोडे।

बलिङमा आकाश सेन गुप्ताले २ विकेट लिए। यस्तै मृनमोए दक्ता, अभिनव चौधरी र शिवशंकर रोयले १/१ विकेट झारे।