एजेन्सी – घरेलु टोली युएईले सोमबार राती एसीसी टी-२० एसिया कपमा ओमानलाई ४२ रनले हराउदै सुपर फोरको सम्भावना कायमै राखेको छ ।

जित्नलाई १ सय ७३ रनको लक्ष्य पछ्याएको ओमान १८.४ ओभरमा १ सय ३० रनमा अल आउट भयो । ओमानका कप्तान जतिन्दर सिँह २०, अर्यान बिष्ट २४ र बिनायक शुक्ला २० रन बनाउन बाहेक अन्यले राम्रो प्रदर्शन गर्न सकेनन् ।

युएईका तीव्र गतिका बलर जुनैद सिद्दिकीले ४ ओभरमा २३ रन खर्चेर ४ विकेट लिए । हैदर अलि र महम्मद जवादुल्लाले २-२ विकेट लिए ।

त्यसअघि आबुधावीमा टस हारेर ब्याटिङको निम्तो पाएको युएईले २० ओभरमा ५ विकेट गुमाउँदै १ सय ७२ रन बनाएको थियो । युएईका कप्तान मोहम्मद वासिमले ५४ बलमा ६ चौका र ३ छक्कासहित सर्वाधिक ६९ रन बनाए ।

अर्का ओपनर एलिशान शराफुले ३८बलमा ७ चौका र १ छक्कासहित ५१, मोहम्मद जैब २१ र हर्षित कौशिकले १९ रन बनाए । ओमानका जितेन रमानान्दीले २, हसैन साह र साम्य श्रीभाष्तवले १-१ विकेट लिए ।

युएईले आफ्नो अन्तिम खेल बुधवार पाकिस्तानसँग खेल्नेछ । पाकिस्तान र युएईबीचको खेलको विजतो टोली सुपर फोरमा पुग्ने समिकरण बनेको छ । समूह ए बाट भारत लगातार दुई जितका साथ आधिकारीक रुपमै सुपर फोरमा पुगि सकेको छ । समान दुई खेलमा २-२ अंक भएपनि पाकिस्तान नेटरनरेटमा माथि रहँदै दोस्रो र युएई तेस्रो स्थानमा छ ।