एजेन्सी – एसिसी टि ट्वान्टी एसिया कपमा भारतका कप्तान, खेलाडी र अफिसललाई हात मिलाउन नलगाएकोमा जिम्बावेका पूर्व क्रिकेटर तथा आइसिसीका म्याच रेफ्री एन्डी पाइक्राफ्टले पाकिस्तानसँग माफी मागेका छन् ।

गएको आइतवार भएको खेलमा भारतका कप्तान सूर्यकुमार यादवले टसको समयमा पाकिस्तानका कप्तान सलमान अली अघासँग हात मिलाएनन् ।

त्यति मात्रै होइन भारतले पाकिस्तानलाई ७ विकेटले हराएपछि कप्तान सूर्य र शिबम दुबे पाकिस्तानी खेलाडी तथा अम्पायरसँग हात नमिलाई ड्रेसिङ रुममा लागेका थिए । पेभेलिएन र डग आउटमा भएका भारतीय खेलाडी, कोच र अफिसलपनि मैदानमा हात मिलाउन आएनन् ।

तर पाकिस्तानी खेलाडी भने हात मिलाउन तयार थिए । भारतीय खेलाडी नआएपछि खेलपछि गरिने कप्तान कुराकानीमा सलमान अली अघापनि गएनन् ।

उक्त खेलका म्याच रेफ्री एन्डीले भारतीय कप्तान र खेलाडीलाई खेल भावना अनुसार हात मिलाउन लगाउनु पर्ने भन्दै पाकिस्तान क्रिकेट बोर्ड (पिसिबी) ले असन्तुष्टि जनाएको थियो ।

पिसिबी आइसिसीलाई उक्त खेलका म्याच रेफ्री एन्डीलाई एसिया कपबाटै हटाउनु पर्ने अन्यथा अन्तिम खेल युएईविरुद्ध नखेल्ने चेतावनी दिएको थियो । तर आइसिसीको पाकिस्तानको त्यो माग अस्वीकार गरेको थियो ।

त्यसैको कारण आज हुने युएईविरुद्धको खेलमा पाकिस्तान समयमै मैदान पुगेन । खेल एक घण्टा पछि धकेलियो । उता पिसिबी तथा एसियन क्रिकेट काउन्सिल(एसीसी) का अध्यक्ष मोहसीन नक्वीले पूर्वअध्यक्ष रमिज राजा र नाजम सेठ्ठीसँग बुधवार साँझ लाहोरमा यो विषयमा छलफल गएका थिए ।

एन्डीले पाकिस्तानका कप्तान, प्रशिक्षक र टिम म्यानेजरसँग बसेर माफी मागेपछि पाकिस्तान खेल्न तयार भएको हो । केहि महिना अघि भारतको जम्मु कश्मिरमा रहेको गहलगाममा पाकिस्तानी आतंककारी आक्रामण भएपछि दुबै देशको राजनीतिसँगै खेलकुद सम्बन्ध पनि बिग्रिएको थियो ।

यसअघि भारत र पाकिस्तानका खेलाडीले खेलको समयमा हात मिलाउनुको साथै कुराकानी गर्दै आएका थिए । उक्त आक्रामण पछि भने भारतीय खेलाडीले हात मिलाउन र कुराकानी गर्न अस्वीकार गरेका हुन् ।

पाकिस्तान र युएईबीचको खेल नेपाली समय अनुसार आज साँझ ८ : ३० बजे सुरु हुनुपर्ने थियो । तर पाकिस्तान टोली खेल सुरु हुनु भन्दा आधा घण्टासम्म होटलमै बसेको थियो ।

पछि सहमति भएपछि पाकिस्तान दुबई मैदान पुगेको थियो । युएईका कप्तान मोहम्मद वासिमले टस जितेर पहिला बलिङ गर्ने निर्णय लिएका हुन् । पाकिस्तान र युएईसँगको खेलको म्याच रेफ्रीमा एन्डी नै छन् ।

पाकिस्तान र युएईबीचको खेलको विजेता टोली समूह ‘ए’ बाट सुपर फोरमा पुग्ने समिकरण बनेको छ ।