काठमाडौं (हाम्रो खेलकुद) – काठमान्डु गोर्खाजले नेपाल प्रिमियर लिग (एनपिएल) क्रिकेटका लागि चौथो विदेशी खेलाडीको रुपमा बेन चार्ल्सवर्थलाई लिएको छ । देव्रे हातले ब्याटिङ र दाहिने हातले बलिङ गर्ने यी २४ वर्षे अलराउन्डर ग्लोसेस्टरसायरबाट इंग्लिस काउन्टी खेल्दै आएका छन् ।

करण केसी मार्की रहेको गोर्खाजले यसअघि नै इंग्ल्यान्डमा खेल्दै आएका दक्षिण अफ्रिकाका विकेटकिपर–ब्याटर रिकार्डो भास्कोनेसेलोस, नामिबियाका कप्तान जेरहार्ड इरसमस र अमेरिकी ब्याटर मिलिन्द कुमारलाई आउदो सिजनको एनपिएलका लागि अनुबन्धन गरिसकेको छ ।

चार्ल्सवर्थले १७ वर्षको उमेरमा ग्लोसेस्टरसायरबाट प्रथम श्रेणीको क्रिकेटमा ‘डेब्यु’ गरेका थिए । त्यसयता उनी निरन्तर सोहि टोलीबाट काउन्टीमा खेल्दै आएका छन् र ५७ खेलमा ३१ माथिको औषतमा २७५४ रन बनाइसकेका छन्, जसमा ४ शतक र १५ अर्धशतक छ । सोक्रममा उनले ३० विकेट पनि लिएका छन् ।

चार्ल्सवर्थले २८ लिष्ट ‘ए’ खेलमा १ हजार रनको आँकडा छुनेक्रममा छन् । ट्वान्टी–२० मा उनले ४४ खेलमा ३ अर्धशतकसहित ७७६ रन बनाइसकेका छन् । उनले १४५ माथिको स्ट्राइक रेटमा यो रन बनाएका हुन् । इंग्ल्यान्डबाट यू–१९ मा प्रतिनिधित्व गरिसकेका चार्ल्सवर्थ गत सिजनको यूएईको आईएल टी २० मा एमआई इमिरेट्सको टोलीमा रहेका थिए ।

काठमाडौं स्पोर्टस डेभलपमेन्ट भेन्चर्स प्रालीको स्वामित्वमा रहेको गोर्खाज गत सिजन प्लेअफमा पुग्न सकेको थिएन ।

पूर्ण टोली :

करण केसी, भीम सार्की, साहब आलम, मोहमद आदील आलम, राशिद खान, प्रतिक श्रेष्ठ, दीपेश कँडेल, उत्तम मगर, आकाश त्रिपाठी, सन्तोष यादव, तुल बहादुर थापा

विदेशी खेलाडी : रिकार्डो भास्कोनेसेलोस, जेरहार्ड इरसमस, मिलिन्द कुमार, बेन चार्ल्सवर्थ

मुख्य प्रशिक्षक : मोन्टि देशाइ

सहायक प्रशिक्षक : वसन्त शाही