मुम्बई (एजेन्सी) – इन्डिएन प्रिमिएर लिग अन्तर्गत आइतबार भएको दोश्रो खेलमा मुम्बई इन्डिएन्सले कोलकाता नाइट राइडर्सलाई ४ विकेटले पराजित गरेको छ।

पहिलो ब्याटिङ गरेको कोलकाताले निर्धारित २० ओभरमा ७ विकेटको क्षतिमा १७८ रन जोेडेको थियो। मनिष पाण्डेले ४७ बलमा ८१ रनको उत्कृष्ट पारी खेलेपछि कोलकाताले राम्रो योगफल तयार पारेको थियो। ओपनरद्वय गौतम गम्भीर(१९) र क्रिस लिन (३२)ले राम्रो सुरुवात दिलाएपनि मध्यक्रमका अन्य ब्याट्सम्यान चल्न सकेनन्। मुम्बईका लागि क्रुनाल पाण्डेले ३ विकेट लिए भने लासिथ मालिङ्गाको नाममा २ विकेट रह्यो।

जवाफी ब्याटिङमा उत्रिएको मुम्बईले पनि राम्रो सुरुवात गर्यो। पार्थिव पटेल र जस बटलरले ६५ रनको साझेदारी गर्दै मुम्बईलाई जिततर्फ अग्रसर गराएका थिए। तर लगातार विकेट पतन भएपछि मुम्बई केहि दबाबमा देखिएको थियो। नितिस रानाले २९ बलमा ५० रन प्रहार गरेपछि मुम्बई खेलमा फर्किएको थियो। ११ बलमा ३ चौका र २ छक्का प्रहार गर्दै २९ रन जोडेका हार्दिक पाण्ड्याले जित सुनिश्चित पारेका थिए।
कोलकाताका लागि अंकित राजपुतले ३ विकेट लिएका थिए।