बेंगलोर (एजेन्सी) – इन्डियन प्रिमिएर लिग अन्तर्गत आइतबार भएको दोश्रो खेलमा राइजिङ पुने सुपरजाएन्ट्सले घरेलु टोली रोयल च्यालेन्जर्स बेंगलोरलाई २७ रनले पराजित गरेको छ।

टस जितेर फिल्डिङ रोजेको बेंगलोरले राम्रो सुरुआत पाउन सकेन। पुनेका लागि ओपनर अजिङ्क्या रहाने र राहुल त्रिपाठीले पहिलो विकेटका लागि ६३ रनको साझेदारी गरेका थिए। रहानेले ३० रन बनाउँदा त्रिपाठीले ३१ रन जोडेका थिए। पुनेका लागि कप्तान स्मिथले २७ रन बनाएका थिए भने महेन्द्र सिंह धोनीले २८ रन जोडे।

मनोज तिवारीले ११ बलमा २७ रनको उत्कृष्ट पारी खेलेपछि पुनेले निर्धारित २० ओभरमा ८ विकेट गुमाउँदै १ सय ६१ रन जोडेको थियो। बेंगलोरका एडम मिल्न र अरविन्दले २/२ विकेट लिएका थिए। स्यामुएल बद्री, सेन वाट्सन र पवन नेगीको नाममा १/१ विकेट रह्यो।

१ सय ६२ रनको लक्ष्य पछ्याउन मैदान आएको बेंगलोरले दोश्रो ओभरमै ओपनर मन्दिप सिंहलाई गुमाएको थियो। त्यसपछि कप्तान विराट कोहली र एबी डे भिलिएर्सले पारी उकासेका थिए। छैठौं ओभरमा आउट हुनुअघि कोहलीले २८ रन बनाए। डि भिलिएर्स २९ रन जोड्दै स्टम्प्ड भएका थिए। मध्यक्रममा अन्य कुनै ब्याट्सम्यानले ठुलो स्कोर बनाउन नसकेपछि बेंगलोर पराजित भएको थियो।

बेंगलोरले निर्धारित २० ओभरमा ९ विकेट गुमाउँदै १३४ रन जोडेको थियो। पुनेका सर्दुल ठाकुर र बेन स्टोक्सले ३/३ विकेट लिएका थिए। जयदेव उनदकटले २ विकेट लिँदा इमरान ताहिरको नाममा १ विकेट रह्यो।