दिल्ली (एजेन्सी) – इन्डियन प्रिमियर लिग अन्तर्गत शनिबार राती भएको खेलमा मुम्बई इन्डियन्सले दिल्ली डेयरडेभिल्सलाई १ सय ४६ रनको विशाल अन्तरले पराजित गरेको छ। यो आइपीएल इतिहासकै सबैभन्दा ठुलो रन अन्तरको जित हो। यस जितसंगै मुम्बई प्लेअफमा स्थान बनाउने पहिलो टोली बनेको छ।
पहिलो ब्याटिङ गरेको मुम्बईले निर्धारित २० ओभर खेल्दै ३ विकेटको नोक्सानीमा २ सय १२ रन बनाएको थियो। ओपनर लेन्डल सिमन्स र पार्थिव पटेलले ७९ रनको आक्रामक सुरुवात दिलाएसंगै मुम्बई ठुलो योगफलतर्फ अग्रसर भएको थियो। पटेलले २५ रन जोडे भने सिमन्सले ४३ बलमा ५ चौका र ४ छक्कासहित ६६ रन बनाएका थिए। मध्यक्रममा काइरण पोलार्डले ३५ बलमा अविजित ६३ रन जोडेपछि मुम्बईले २ सय रन कटाएको थियो। हार्दिक पाण्ड्या १४ बलमा १ चौका र ३ छक्काको मद्दतले २९ रन बनाउदै अविजित रहे।
जवाफी ब्याटिङमा उत्रिएको दिल्लीले भने १३ दशमलब ४ ओभरमा अलआउट हुनुअघि ६६ रन मात्र जोड्न सक्यो। उसका लागि ओपनर करुण नायरले २१ र कोरी एन्डरसन र प्याट्रिक कमिंसले समान १०/१० रन बनाउनु बाहेक अन्यले दोहोरो अंक छुन सकेनन्। ओपनर सन्जु स्याम्सन इनिङको पहिलो बलमै आउट भएपछि सुरु भएको दिल्लीको विकेट पतन अन्त्यसम्म कायम रह्यो। मुम्बईका लागि कर्ण शर्मा र हरभजन सिंहले समान ३/३ विकेट लिए भने लासिथ मालिंगाले पनि २ विकेट हात पारे।
