किङ्सटन (एजेन्सी)– भारतले वेस्ट इन्डिजाविरुद्धको पाँच एक दिवसिय अन्तर्राष्ट्रिय क्रिकेट श्रृखंलाको ३–१ ले जितेको छ । श्रृखंलाको पाँचौं तथा अन्तिम खेल बिहीबार ८ विकेटले जित्दै भारतले श्रृखंला जितेको हो । कप्तान विराट कोहलीले अविजित शतक बनाएपछि २ सय ६ रनको लक्ष्य पछएको भारतले २ विकेटको क्षेतिमा ७९ बलअघि नै जित हासिल गरेको थियो ।

कोहली र अर्धशतक बनाएका दिनेश कार्तिकले तेस्रो विकेटका लागि अविजित १ सय २२ रनको साझेदारी गर्दै टोलीको जित सहज बनाएका थिए । कार्तिकले ५२ बलमा ५ चौकाका साथ ५० रन बनाए ।

१ सय १५ बल खेलेका कोहलीले १२ चौका र २ छक्काको मद्दतमा १ सय ११ रन बटुले । एक दिवसिय क्रिकेटमा कोहलीको त्यो २८ औं शतक हो । त्यसअघि ओपनर शिखर धवन ४ रनमा आउट भए भने अर्का ओपनर अन्जिके रहानले ३९ रन जोडे । रहानेले दोस्रो विकेटका लागि कोहलीसँग ७९ रनको साझेदारी गरेका थिए । घरेलु टोलीका लागि अल्जारी जोसेप र देवेन्द्र विसोले समान १ विकेट लिए ।

त्यसअघि टस जितेर ब्याटिङ गरेको वेस्ट इन्डिजले ५० ओभरमा ९ विकेट गुमाउँदै २ सय ५ रनको सामान्य स्कोर खडा गरेको थियो । घरेलु टोलीका ब्याट्सम्यानमाथि भारतीय बलहरु हावी भएका थिए । मोहम्मद सामी र उमेश यादवले आपसमा ७ विकेट बाड्दै घरेलु टोलीको ब्याटिङलाइनअप ध्वस्त पारेका थिए ।

समान १० ओभर बलिङ गरेका सामीले ४ र यादवले ३ विकेट लिएका थिए । हार्दिक पाण्डेय र केदार जादवले समान १ विकेट लिए । वेस्ट इन्डिजसका लागि साही होपले ५१, कायल होपले ४६, जासन होल्डरले ३६, रोभम्यान पावलले ३१ र जासन मोहम्मदले १६ रन जोडे भने अन्य कुनै पनि ब्याट्सम्यानले दोहोरो अंकमा रन बनाउन सकेनन् । कप्तान कोहली म्यान अफ दी म्याच तथा सोही टोलीका रहाने म्यान अफ दी सिरिज घोषित भए ।