काठमाडौँ (हाम्रो खेलकुद)– अफगानिस्तानसँग पराजित भएसँगै नेपाल आइसिसी यू १९ विश्व कपमा छनोट हुन असफल भएको छ । झिनो सम्भावनाका साथ मंगलबारको खेलमा उत्रेको नेपाली टोली अफगानिस्तानसँग ९६ रनले पराजित भएको हो ।
फाइल तस्बिर
विश्व कप एसिया छनोटमा नेपाल अफगानिस्तानसँगको दुवै खेलमा पराजित भयो । छनोटका सबै खेल जितेको अफगानिस्तानले अर्को बर्ष आयोजना हुने विश्व कपमा एसियाको प्रतिनिधित्व गर्नेछ । छनोटमा सहभागी अन्य दुई राष्ट्र सिंगापुर र मलेसियालाई भने नेपालले दुवै खेलमा पराजित गरेको थियो ।
छनोट भरका कुनै पनि खेलमा नेपालको ब्याटिङ सन्तोषजनक रहन सकेन । बलिङमा उच्च प्रदर्शन नेपालका लागि एक खेलाडीले मात्र अर्धशतक पुरा गरेका थिए । मंगलबारको खेलमा १ सय ९६ रनको लक्ष्य पछ्याएको नेपाल ९९ रनमा अलआउट भएको थियो ।
नेपालकालागि दिपेन्द्र सिंह ऐरीले ४८ रन बनाएपनि अन्य ब्याट्सम्यानले गतिलो पारी खेल्न सकेनन । १० रनमा ओपनर सन्दिप सुनारलाई गुमाएको नेपालले ३४ रनमा महत्वपूर्ण ५ विकेट गुमाई सकेको थियो । दिपेन्द्र र पवन शर्राफले छैटौं विकेटका लागि साझेदारी बनेपनि त्यो धेरै टिक्न सकेन । ८५ रनमा पवन र दिपेन्द्रलाई गुमाएपछि नेपाल औपचारिकतामा मात्र सिमित भएको थियो । सन्दिप ६ रन , आसिफ शेख २ , अनिल शाह ६ रोहित पौडेलले ३, कप्तान सन्दिप लामिछाने २ रन बनाएका थिए ।
यसअघि अफगानिस्तानले १ सय ९५ रन बनाएको थियो । इब्राहिम जद्रानले शतकीय पारि खेलेका थिए । १ सय १४ बलको सामना गरेका जद्रानले ७ चौका र ५ छक्काको मद्दतले १ सय १ रन बनाए । जद्रान ४१ औं ओभरमा दिपेन्द्र सिंह ऐरीको बलमा छैटौं विकेटको रुपमा पेभेलियन फर्केका थिए । जद्रानले पाँचौ विकेटका लागि २४ रन जोडेका विकेटकिपर ब्याट्सम्यान इक्रम अल खलिलसँग मिलेर ७४ रनको महत्त्वपूर्ण साझेदारी गरेका थिए । अफगानिस्तानका लागि ओपनर नबिद ओबेदले २२ रन जोडेका थिए। अन्य कुनै ब्याट्सम्यानले उल्लेख्य रन जोड्न सकेनन ।
नेपालका लागि साहब आलमले ४ र दिपेन्द्र सिंह ऐरीले ३ विकेट लिएका थिए । सन्दिप लामिछाने र पवन शर्राफले समान १ विकेट लिए ।
