काठमाडौं (हाम्रो खेलकुद)– भारत भ्रमणमा रहेको नेपाली क्रिकेट टोलीले अभ्यास खेलमा लगातार दोस्रो जित हासिल गरेको छ । आजको खेलमा उप कप्तान ज्ञानेन्द्र मल्लको शतकबाट प्ररित नेपाली टोली मिलानपुर रिक्रियसन क्लबलाई ५२ रनले पराजित गर्यो ।

२ सय ५२ रनको लक्ष्य पछ्याएको मिलानपुरले राम्रो सुरुआत गरेपछि टोलीले ५० ओभरमा ८ विकेटको क्षतिमा १ सय ९९ रनमा बनाउन सक्यो । तर पहिलो विकेटको साझेदारी टुटेपछि भने टोलीले उच्च साझेदारी गर्न सकेन । टोलीका ए रत्नमले अविजित ३५ रन तथा सन्नीकुमार सिंहले १० गणेश मूर्तीले ११ रन जोडे ।

ओपर सुदन सञ्जिव र आर विवेकले पहिलो विकेटका लागि ७४ रनको साझेदारी गरेका थिए । सुदनले ३७ र विकेक ३८ रन बनाए । नेपालका लागि सागर पुन सुशन भारीले समान २ तथा सन्दीप लामिछाने र दीपेन्द्र सिंह ऐरीले १/१ विकेट लिएका थिए ।

त्यसअघि टस जितेर ब्याटिङ गरेको नेपालले ज्ञानेन्द्रको शतकसँगै ७ विकेटको क्षतिमा २ सय ५१ रन बनाएको छ । ज्ञानेन्द्रले पहिलो विकेटका लागि सागर पुनसँग ६७ रनको साझेदारी गरेका थिए । सागरले २५ रन जोडे भने शरद भेषावकर अर्धशतकबाट २ रनले चुके । शरदले ७३ बलमा ३ चौकाको मद्दतमा ४८ रन जोडे ।

पहिलो अभ्यास खेलमा रनको खाता खोज्न नसकेका कप्तान पारस खड्काले २२ रन बनाए । करन केसीले २०, पहिलो खेलमा अर्धशतक बनाएका सोमपाल कामीले अविजित १६, अरिफ शेखले अविजित ६ र दीपेन्द्र सिंह ऐरीले ३ बनाएका थिए । विनोद भण्डारीले रनको खाता खोल्न सकेनन् । ज्ञानेन्द्रले १ सय २३ बलमा १३ चौका र १ छक्का प्रहार गरेका थिए । रिक्रियसनका लागि गणेश मूर्ती, एभिआर रथनाम र एन हरिशले समान २ विकेट लिएका थिए ।

विश्व क्रिकेट लिग (डब्लुसिएल) च्याम्पियनसिप अन्तर्गत यो महिनाको अन्त्यतिर हुने दुई खेलको अन्तिम तयारीका लागि नेपाली टोली भारत यात्रामा निस्केको थियो । नेपाल र हङकङबीच असोज र २७ र २९ मा हङकङमा दुई खेल हुनेछ । भारत भ्रणमका चार अभ्यास खेल मध्ये पहिलो खेलमा नेपाली टोलीले डिन्डिगुल ड्रागन्सलाई १ सय ५३ रनको फराकिलो अन्तरले हराएको थियो । तेस्रो अभ्यास खेल शनिबार हुनेछ ।