कानपुर (एजेन्सी)– विराट कोहलीको नेतृत्वमा रहेको क्रिकेट टोलीले तेस्रो तथा अन्तिम खेलमा आज न्युजिल्यान्डलाई ६ रनले हराएसँगै भारतले तीन एक दिवसिय क्रिकेट श्रृखंला २–१ ले जितेको छ ।
जवाफमा उत्कृष्ट प्रदर्शन गरेको भ्रमणकारी टोलीले ४६ ओभरसम्म पनि खेल जित्ने सम्भावना देखाएको थियो । तर, अन्त्यतिर जस्प्रित बुम्राह र भुवनेश्वर कुमारले उत्कृष्ट बलिङ गरेपछि ३ सय ३८ रनको लक्ष्य पछएको न्युजिल्यान्डले ७ विकेट गुमाएर ३ सय ३१ रन बनाएको थियो । सन् २०१६ यता भारतले भारतले लगातार ७ वटा एक दिवसिय श्रृखंला जितेको छ ।
टस हारेर पहिले ब्याटिङको निम्ता पाएको भारतले त्यसको पुरा पुर फाइदा उठाउँदै ६ विकेटको क्षतिमा ३ सय ३७ रन बटुलेको थियो । ओपनर रोहित शर्मा र कप्तान विराट कोहलीले दोस्रो विकेटका लागि २ सय भन्दा बढीको साझेदारी गरेपछि भारतले उच्च स्कोर बनाएको थियो ।
१४ रन बनाएर ओपनर शिखर धवन आउट भएपछि अर्का ओपनर रोहित र कोहलीले मोर्चा सम्हालेका थिए । उनीहरुले दोस्रो विकेटका लागि २ सय ३० रनको महत्वपूर्ण साझेदारी गरे । उनीले २ सय बढी रनको साझेदारी गरेको यो चौथो पटक हो । रोहितले १ सय ३८ बलमा १८ चौका र २ छक्को मद्दतमा १ सय ४७ रन बनाए ।
एक दिवसिय क्रिकेटमा सोही खेलमार्फत ९ हजार रन पुरा गरेका कोहलीले १ सय ६ बलमा १ सय १३ रन जोडे । उनले ९ चौका र १ छक्का प्रहार गरे । महेन्द्र सिंह धोनीले २५ र केदार जादवले १८ रन जोडे ।
न्युजिल्यान्डका टिम साउथी, एडम मिल्ने र मिचेल सान्टनेरले समान २ विकेट लिएका थिए । जवाफमा न्युजिल्यान्डका ३ खेलाडीले अर्धशतक पुरा गरेपनि टोली जितबाट विमुख हुन पुग्यो । ओपनर कोलिन मुर्नो (७५), कप्तान काने विलियम्सन (६४), टोम लाथम (६५) ले अर्धशतक बनाएका थिए । भारतका लागि बुम्राहाले ३, युजभेन्द्र चाहालले २ र भुवनेश्वरले १ विकेट लिएका थिए ।
