काठमाडौं (हाम्र खेलकुद) – बालुवाटार क्रिकेट क्लब र रोयल पीसी फाइटर समूह ‘बी’ मा अपराजित रहँदै एक खेल अगावै खुकुरी च्यालेञ्जर कप टी–ट्वान्टी क्रिकेट प्रतियोगिताको क्वार्टरफाइनलमा प्रवेश गरेका छन् । मुलपानी क्रिकेट मैदानमा बिहिबार भएको खेलमा बालुवाटारले लर्डबुद्ध क्रिकेट एकेडेमीलाई १ सय ५ रनको फराकिलो रन अन्तरले तथा रोयलले त्रिमुर्ति ब्वाइजलाई ५८ रनले पराजित गर्दै अन्तिम आठमा पुग्न सफल भएका हुन्।

अपराजित दुवै टिमको ३ खेलबाट ९ अंक छ । तर, नेट रनरेटमा बालुवाटार शीर्ष स्थानमा छ । आइतबार हुने यी दुई बीचको खेलले नै समूह ‘बी’ को विजेता टुङ्गो लगाउनेछ । बालुवाटारले दिएको २ सय ९ रनको विशाल लक्ष्य पछ्याएको लर्डबुद्धले निर्धारत २० ओभरमा ९ विकेट गुमाएर १ सय ३ रनमात्र बनाउन सक्यो ।

लर्डबुद्धका प्रसुन थापामगरले ३४ र अनुप श्रेष्ठले २४ रन बाउनुबाहेक अन्य ब्याट्सम्यानले राम्रो प्रदर्शन गर्न सकेनन् । एम श्रीवास्तवले १४ तथा पविन्द्र राजभण्डारीले ११ रन बनाए । तीन ब्याट्सम्यानले खाता नै खोल्न सकेनन् । लर्डबुद्धलाई सस्तैमा समेट्न शैसव केसीले ३ विकेट लिए । सोनु तामाङ र अमर सिंह राउटेलाले समान २ विकेट लिदा पृथु बास्कोटाले १ विकेट लिए ।

यसअघि टस जितेर पहिले ब्याटिङ गरेको बालुवाटारले मध्यक्रमका ब्याट्सम्यान सोनु तामाङको आक्रामक १ सय ३१ रनको अविजित रन मद्दतमा ४ विकेट गुमाएर २ सय ८ रनको विशाल योगफल तयार पारेको थियो । ५९ बल खेलेका सोनुले १२ चौका र ९ छक्का प्रहार गरे । २६ बलमा अर्धशतक बनाएका सोनुले ५० बलमा शतक पुरा गरेका थिए ।

सुमन उदय र पृथुले समान २६ रन बनाए । ओपनर प्रनित थापामगर ८ रनमा आउट हुदा अमरसिंह राउटेला गोल्डेन डगआउट भए । लर्डबुद्धका तेजेन्द्र राजभण्डारीले २ तथा कृष्ण गजुरेल र प्रसुन थापामगले समान १ विकेट लिए ।

बिहीबारै भएको पहिलो खेलमा रोयलले त्रिमुर्ति ब्वाइजलाई ५८ रनले पराजित ग¥यो । १ सय ८३ रनको लक्ष्य पछ्याएको त्रिमुर्तिले २० ओभरमा ९ विकेट गुमाएर १ सय २४ रनमात्र बनाउन सक्यो । ओपनर हिमांशु दत्तले ५७ रनको अर्धशतकय इनिङ्स खेलेपनि अन्य ब्याट्सम्यानले राम्रो प्रदर्शन गर्न नसक्दा पराजित हुन पुग्यो ।

आशिष लामा १६ तथा दिनेश कुँवरले १० रन बनाउनुबाहेक अन्य ब्याट्सम्यानले दोहोरो अंक छुन सकेन । त्रिमुर्तिलाई सस्तैमा समेट्न भेट्रान महबुव आलमले ३ विकेट लिए । धिरज शाही र बसन्त खत्रीले समान २ विकेट लिए ।

यसअघि टस हारेर पहिले ब्याटिङको निम्तो पाएको रोयल पीसीले ६ विकेट गुमाएर १ सय ८२ रन बनाएको थियो । ओपनरद्धय प्रकाह विष्ट र शम्शेर चन्दलाई शुन्य रनमा गुमाएको रोयलका नरेश चन्दले अविजित ७५ रनको योगदान दिए । सुवास खकुरेलले ४० तथा रविन जोशीले ३० रनको योगदान दिए ।

त्रिमुर्तिका सन्दिप तामाङले ३ विकेट लिए । विज्ञान गौतम, आशिष लामा र दिनेश कुँवरले समान १ विकेट लिए । प्रतियोगिता अन्र्तगत शुक्रबार समूह ‘डी’ अन्र्तगतको बुटवल क्रिकेट ब्वाइज र टिकापुर क्रिकेट क्लब तथा रौतहट राइजिङ–११ र डिष्ट्रिक स्पोर्टस क्लबबीच खेल हुनेछ ।