काठमाडौं (हाम्रो खेलकुद) – आइसिसी विश्व क्रिकेट लिग डिभिजन–२ प्रतियोगिता अन्तर्गत आजको पहिलो खेलमा नेपालले नामिबियालाई १ विकेटले पराजित गरेको छ ।

 

१ सय ३९ रनको सानो लक्ष्य पछ्याएको नेपालको ८ विकेटको क्षतिमा १ सय ४ रन थियो । तर पुछारका ब्याट्सम्यानले राम्रो प्रदर्शन गरेपछी नेपाल हारबाट जोगियो । नेपालले आफ्नो लक्ष्य ४ बल बाँकीं छँदा पुरा गर्न सफल भएको हो । आज ओपनर दिलिप नाथ तथा आरिफ शेख खाता नखोली पभेलियन फर्के । त्यस्तै १५ रन बनाएका उपकप्तान ज्ञानेन्द्र मल्ल र १९ रन जोडेका कप्तान पारस खड्का पनि क्रिजमा जम्न सकेनन् ।

शरद भेषावकरले नेपालका लागि सर्वाधिक २९ रन जोडे भने आज डेब्यु गरिरहेका रोहित पौडेलले १७ रन बनाए । दिपेन्द्र ऐरी ६ रन, करन केसी ३ रन र सोमपाल कामीको १३ रनमा आउट भए । तर वसन्त रेग्मीको २४ रनको योग्दान नेपालको जितको आधार बन्यो । वसन्तले ४९ औं ओभरमा छक्का तथा अन्तिम ओभरमा चौका प्रहार गर्दै नेपालको रोमाञ्चक जित सुनिश्चित गरेका थिए । नामिबियाका लागि बर्नार्ड स्कोल्ट्जले सर्वाधिक ४ विकेट लिएका थिए ।

यस अघि टस जितेर पहिले फिल्डिङ रोजेको नेपालले नामिबियालाई ३४.२ ओभरमा १ सय ३८ रनमा अलआउट पार्न सफल रह्यो । नेपालका लागि सन्दिप लामिछानेको बलिङ प्रदर्शन निकै राम्रो रह्यो । ८.२ ओभर बलिङ गरेका सन्दिपले २ मेडेन साथ १८ रन खर्चिँदै ४ विकेट लिए । त्यस्तै सोमपाल कामीले ३ विकेट लिए तथा वसन्त रेग्मी, शरद भेषावकर र पारस खड्काले १-१ विकेट लिएका थिए ।

सोमपाल कामीले पहिलो ओभरमै नेपाललाई विकेट दिलाउन सफल भएका थिए । त्यसपछि आक्रामक ब्याटिङ गरेको नामिबियाको एक स्थितिमा २ विकेटको क्षतिमा ७५ रन थियो । तर नेपाली बलरहरुको कसिलो बलिङले नामिबियाको मिडल अर्डर ध्वस्त गरेको थियो ।

नामिबियाका लागि क्रेग विलियम्सले सर्वाधिक ४१ रन जोडे भने जान फ्राइलिन्क र जेन ग्रिनले समान २२ रन जोड्दा अन्य ब्याट्सम्यानले महत्त्वपूर्ण योग्दान दिन सकेनन् । विलियम्सलाई सन्दिपले नै शिकार बनाएका थिए । नेपालले भोली ओमनको सामना गर्ने छ ।