भैरहवा (हाम्रो खेलकुद) – रुपन्देही क्रिकेट संघले नेपालमै पहिलो पटक क्रिकेट खेलाडी, अम्पायर र अफिसियल तथा दर्शकहरुको जीवन बिमा गरेको छ । संघले फागुन १ गतेबाट सुरु हुने नेपाल टेलिकम रुपन्देही सुपर लिग क्रिकेट प्रतियोगितालाई मध्यनजर गर्दै दुर्घटना बिमा गरेको संघका अध्यक्ष प्रशान्त बिक्रम मल्लले बताए ।

खेलाडी, अम्पायर, अफिसीयल र खेल हेर्ने दर्शकलाई हुन सक्ने सम्भावित दुर्घटनालाई लक्षित गरी संघले दुर्घटना बिमा गरेको बताइएको छ । खेल संचालन हुनु एक दिन अघि सोमबार संघ र सगरमाथा इन्स्योरेन्स कम्पनी लि. भैरहवा शाखाबीच दुर्घटना बिमामा सहमति भएको हो ।

सहमति पत्रमा सगरमाथा इन्स्योरेन्स कम्पनीका क्षेत्रीय प्रबन्धक गोपाल ज्ञवाली र क्रिकेट संघका अध्यक्ष प्रशान्त विक्रम मल्लले हस्ताक्षर गरेका छन् । प्रबन्धक ज्ञवालीका अनुसार खेल अवधिभर रंगशाला भित्र खेलाडी, अम्पायर, दर्शक मध्ये कसैको दुर्घटना भएमा उपचार खर्च र मृत्यु भएमा मृतकलाई कम्पनीले पाँच लाख उपलब्ध गराउने छ ।

सहमति पत्र हस्ताक्षर कार्यक्रममा जिल्ला सदस्य खेमराज भुषालको पनि उपस्थिती थियो । खेलाडी, अम्पायर, अफिसीयल र दर्शकहरुको दुर्घटना बिमा पछि क्रिकेट खेलमा रुपन्देहीले अझ फडको मार्ने निश्चित भएको सदस्य भुषालले बताए ।

दुई दशक अघि २०४५ सालमा स्थानिय अन्तर क्लब क्रिकेट हुदा स्थानिय युवा ब्याट्सम्यान सुरेश श्रेष्ठको टाउकोमा बलले लागेर निधन भएको थियो । बलले टाउकोमा लागेपछि गंभिर भएका श्रेष्ठको ३ दिनपछि निधन भएको थियो ।

सो घटनालाई समेत स्मरण गर्दै खेल मैदानमा खेलका क्रममा हुने कुनै पनि दुर्घटनालाई लक्षित गरी बिमा भएको सचिब संजय गुरुंगले बताए ।नेपाली खेलकुदको ईतिहासमा आयोजक सस्थाले खेलाडी, अम्पायर, अफिसीयल र दर्शकहरुको दुर्घटना बिमा गरेको यो पहिलो पटक हो ।

रुपन्देही सुपर लिगमा २१ क्लब
रुपन्देही क्रिकेट संघको आयोजनामा मंगलबारदेखि (फागुन १ बाट) सुरु हुने नेपाल टेलिकम सुपर लिग क्रिकेट प्रतियोगितामा रुपन्देही जिल्लाका २१ क्लबको सहभागिता हुने भएको छ ।भैरहवास्थित सिद्धार्थ रंगशालामा आयोजना हुने रुपन्देही सुपर लिग क्रिकेट प्रतियोगिता हुन लागेको संघका अध्यक्ष प्रशान्त विक्रम मल्लले बताए ।

जसमा (ए) डिभिजनका ८ क्लब छन् भने बाकी (बी) डिभिजनका १३ क्लब छन् । प्रतियोगिताको सुरुमा (बी) डिभिजनका १३ क्लबबीच प्रतिस्पर्धा हुनेछ । त्यसबाट उत्कृष्ट चार टिमलाई छनौट गरी (ए) डिभिजनका टिममा समावेश गरी १२ टिमबीच सुपर लिगमा प्रतिस्पर्धा गराइने अध्यक्ष मल्लले बताए ।

प्रतियोगितामा विजेता क्लबले उपाधिसहित ७० हजार र दास्रो हुने टोलीले ३५ हजार रुपैयाँ प्राप्त गर्नेछन् । प्रतियोगिताको म्यान अफ दी सिरिजले १० हजार तथा उत्कृष्ट बलर र उत्कृष्ट ब्याट्सम्यानले समान ५ हजार रुपैयाँ प्राप्त गर्नेछन् । त्यसतै हरेक खेलको म्यान अफ दी म्याचले १ हजार रुपैयाँ प्राप्त गर्नेछन् । फागुन २६ गतेसम्म चल्ने प्रतियोगिताका लागि झन्डै ७ लाख रुपैयाँ खर्च हुने लिग संयोजक संयोजक विनय ज्ञवालीले जानकारी दिए ।