काठमाडौं (हाम्रो खेलकुद)– नेपालले बुधबार आइसीसी विश्व क्रिकेट लिग डिभिजन–२ को अन्तिम खेल खेल्दैछ । नेपाली क्रिकेटको भविष्य निर्धारण गर्ने यात्राका रुपमा हेरिएको डिभिजन २ को शीर्ष दुईमा पर्न संघर्ष गरिरहेको छ । बुधबार हुने आफ्नो अन्तिम खेलमा नेपालले क्यानडाको सामना गर्दैछ । खेल नेपाली समयअनुसार दिउसो १ बजेपछि विन्डहोकस्थित वन्डरस क्रिकेट मैदानमा हुनेछ ।

मंगलबार आयोजक नामिवियाले केन्यालाई पराजित गरेपछि नेपाल नेटर रन रेटमा पछि पर्दै तेस्रो स्थानमा झरेको छ । नेपालले शीर्ष दुईमा रहेर जिम्वावेमा हुने विश्वकप छनोटमा छानिनको लागि बुधबारको खेलमा क्यानडालाई पराजित गर्नुपर्ने हुन्छ । क्यानडासँग पराजित भएको खण्डमा नेपाल डिभिजन–२ मै रहनेछ ।

नामिवियाले युएईंलाई पराजित गरे विश्वकप छनोटको लागि छानिनेछ भने, युएईंले नामिवियालाई पराजित गरे राम्रो नेट रनरेट हुने टोली शीर्ष दुईमा रहनेछ । क्यानडा, नामिविया र नेपालको ४ खेलबाट समान ६ अंक रहेको छ । ४ खेलबाटै ४ अंक जोडेको युएईंको नेट रनरेट राम्रो रहेको छ ।

नामिवियामा बलिङ र फिल्डिङमा उत्कृष्ट प्रदर्शन गरेको नेपाली टोलीको ब्याटिङ निकै खराव रहेको छ । यद्दपी टोलीले केन्यासँगको खेलमा भने धर्यतापूर्वक ब्याटिङ गरेको थियो । नेपालले बुधबार पनि आफ्नो ब्याटिङमा सुधार गर्नुपर्ने आवश्यक छ । डिभिजन–२ भन्दा अघि बढ्न बलिङ र फिल्डिङमा उच्च प्रदर्शन गरिरहेको नेपाली खेलाडीको ब्याट चल्नैपर्ने हुन्छ ।

चार खेलमध्ये नेपालका एकाध खेलाडी बाहेक अन्य खेलाडी ब्याटिङमा जम्न सकेका छैनन् । कप्तान पारस खड्काले युएईंविरुद्धको खेलमा ५१ रन र केन्याविरुद्धको खेलमा ४२ रन बनाउदा, केन्याविरुद्धको खेलमा युवा ब्याट्सम्यान राहित कुमार पौडेल र आरिफ शेखले ४७ र ४२ रन बनाउनु बाहेक नेपालको ब्याटिङ प्रदर्शन निकै फितलो छ ।

यता, युवा खेलाडीहरुको बाहुल्य रहेको क्यानडाले डिभिजन–२ मा उच्च प्रदर्शन गरिरहेको छ । क्यानडाले आफ्नो पहिलो खेलमा ओमानलाई ८ विकेटले पराजित गरेको थियो । दोस्रो खेलमा युएईंलाई २३ रनले पराजित गर्दा केन्यालाई ५९ रनले पराजित गरेको थियो । नामिवियासँग १७ रनले पराजित भएको थियो ।

हेड टु हेड
एक दिवसीय क्रिकेटमा नेपाल र क्यानडाले मात्र दुई खेल खेलेका छन् । दुवै टोलीले समान १–१ खेल जितेका छन् । २०१४ को विश्वकप छनोटमा नेपाल क्यानडासँग १२ रनले पराजित भएको थियो । तर, २०१५ को डिभिजन–२ मा नेपालले बदला लिँदै क्यानडामाथि ७ विकेटले हराएको थियो । यस्तो अवस्थामा दुवै टोली इतिहास आफ्नो पक्षमा पार्ने लक्ष्यका बुधबार मैदान उत्रनेछ ।

सन् २०१४ जनवरीमा न्युजिल्याण्डमा भएको विश्वकप छनोटमा नेपाल १२ रनले पराजित भएको थियो । ४१ ओभरमा झारिएको खेलमा क्यानडाले दिएको २ सय ५६ रनको लक्ष्य पछ्याएको नेपालले ८ विकेट बनाएर २ सय ४३ रन बनाएको थियो । त्यतिबेला ८६ रन बनाएको उपकप्तान ज्ञानेन्द्र मल्ल यसपटक ब्याटिङमा जम्न सकेका छैनन् ।

यस्तै सन् २०१५ जनवरीमा भएको डिभिजन–२ कै खेलमा नेपालले क्यानडालाई ७ विकेटले पराजत गरेको थियो । क्यानडाले दिएको १ सय १५ रनको लक्ष्य नेपालले ३ विकेट गुमाएर पूरा गरेको थियो ।

त्यतिबेला नेपालका लागि कप्तान पारसले ७७ रन बनाउदा उपकप्तान ज्ञानेन्द्र मल्ल ३२ रनमा अविजित रहेका थिए । डिभिजन–२ कै लागि नेपाल अहिले नामिवियामा छ । नामिवियामा नेपाल त्यही जितलाई निरन्तरता दिने लक्ष्यमा हुनेछ । अनि क्यानडालाई पराजित गर्दै एक दिवसीय विश्वकपको छनोटको ढोका खोल्नेछ ।