काठमाडौं (हाम्रो खेलकुद) – विश्व क्रिकेट लिग डिभिजन २ को फाइनल खेलमा युएईले टस जित्दै ब्याटिंग गर्ने निर्णय गरेको छ । राउन्ड रबिनका शीर्ष दुई टोली अहिले उपाधिका लागि भिड्दै छन् ।
राउन्ड रबिन अन्तर्गत खेलमा टीम म्यानेजर रमन सिवाकोटीले लिएको तस्बिर।
हिजो क्यानाडालाई १ विकेटले पराजित गर्दै नेपाल अंक तालिकामा शीर्ष स्थानमा पुगेको हो । यसअघि राउन्ड रबिनको खेलमा नेपालले युएईलाई ५ विकेटले पराजित गरेको थियो ।
डिभिजन २ को शिर्ष दुई टोली नेपाल र युएई दुवैले जिम्बावेमा हुने विश्वकप छनोटमा स्थान बनाई सकेका छन् । आजको विजेताले वेष्ट इन्डिज, आयरल्यान्ड, पपुवा न्यु गिनी र नेदरल्यान्ड्ससँगको समूहमा स्थान पाउनेछ भने उपविजेता अफगानिस्तान, स्कटल्यान्ड, जिम्बावे र हङकङसँगको समूहमा रहनेछ । राउन्ड रोबिन र त्यस पश्चात नक-आउट प्रणालीमा खेलिने सो प्रतियोगिताका १० टोलीमध्ये शीर्ष दुई टोली इङ्ग्ल्यान्ड र वेल्समा हुने २०१९ विश्वकपमा छनोट हुने छन् ।
आज तेस्रो स्थानको खेलका लागि क्यानाडा र नामिबिया र पाँचौ र छैटौं स्थानका लागि केन्या र ओमान भिड्दै छन् । पाँचौ र छैटौं स्थानका दुवै टोली डिभिजन ३ मा घटुवा हुने भएकाले केन्या र ओमान डिभिजन ३ मा खेल्ने निश्चित भै सकेको छ ।
