धनगढी (हाम्रो खेलकुद) – प्रधानमन्त्री कप महिला राष्ट्रिय क्रिकेट प्रतियोगिताको पहिलो दिन सुदूरपश्चिम र एपिएफ विजयी भएका छन् । उद्घाटन खेलमा सुदूरपश्चिमले पश्चिमाञ्चललाई ५ विकेटले पराजित गर्यो । अर्को खेलमा एपिएफले मध्यपश्चिमलाई १० ले हरायो ।
धनगढीको फाप्ला त्रिकेट मैदानमा भएको पहिलो खेलमा ७४ रनको लक्ष्य सुदूरपश्चिमाञ्चलले १७.१ ओभरमा ५ विकेट गुमाएर प्राप्त गरेको थियो । सुदुरपश्चिमका लागि विमला भट्टले १८ र कप्तान मञ्जु वोगटीले १२ रन बनाइन् । पश्चिमाञ्चलकी सरस्वती पुनले ३ विकेट लिइन् ।
त्यसअघि टस जितेर ब्याटिङ रोजेको पश्चिमाञ्चलले २० ओभरमा ९ विकेट गुमाउँदै ७३ रन बनायो । टोलीका लागि बर्षा रानाले १४ र सरस्वती पुनले १० रन बनाउन बाहेक अन्यले दोहोरो अंक बनाउन सकेनन् । सुदुरपश्चिमकी लक्ष्मी साउदले ३ र कविता जोशीले २ विकेट लिईन् । सुदूरपश्चिमकी लक्ष्मी नेपाल वेष्टर्न कलेज प्लेयर अफ दी म्याच भइन् ।
अर्को खेलमा ३७ रनको झिनो लक्ष्य सहित मैदान उत्रिएको एपिएफले ४. ५ ओभरमा विना विकेटको क्षेति लक्ष्य प्राप्त गर्यो । ओपनर ज्योती पाण्डेयले १७ र सिता राना मगरले १२ रन बनाइन् । त्यसअघि टस जितेर व्याटिङ गरेको मध्यपश्चिमले १८.४ ओभरमा सबै विकेट गुमाउदै ३६ रन मात्रै बनाउन सक्यो ।
मध्यपश्चिमले १० रन अतिरिक्त पाएको थियो । मध्यपश्चिमका लागी गिता गोसाईले १५ रन जोडिन् । मध्यपश्चिमलाई सस्तैमा समेट्ने क्रममा एपिएफकी रितु रितु कनौजीयाले ४ विकेट लिइन् । रितु नेपाल वेष्टर्न कलेज प्लेयर अफ दी म्याच घोषित भइन् ।
राष्ट्रिय खेलकुद परिषद् (राखेप) का सदस्य सचिव केशव विष्टले प्रतियोगिताको उद्घाटन गरे । सदस्य सचिव विष्टले फाप्ला क्रिकेट मैदानमा प्यारापिट निर्माणका लागि बजेट विनीयोजन गर्ने बताए । राखेपको आयोजना रहेको प्रतियोगिताको व्यवस्थापन कैलाली जिल्ला खेलकुद विकास समितिले गरेको छ ।
खेलकुद विकास समितिका अध्यक्ष दिपक सिंहले धनगढीलाई क्रिकेटको मात्रै होइन खेलकुदकै शहर बनाउनका पहल भइरहेको बताए । प्रतियोगितामा ५ विकास क्षेत्र र एपिएफ गरि ६ टोलीको सहभागिता छ । सागरमाथा सिमेन्टको मुख्य प्रायोजन रहेको प्रतियोगिताकोे ५ लाख र दोस्रो हुने टोलीले २ लाख रुपैयाँ प्राप्त गर्नेछ ।
