केप टाउन (एजेन्सी) – तेस्रो टि-२० अन्तर्राष्ट्रियमा दक्षिण अफ्रिकालाई ७ रनले पराजित गर्दै भारतले श्रृंखला आफ्नो नाममा पारेको छ । भारतले श्रृंखलाको निर्णायक खेलमा गए राति जित दर्ता गर्न सफल रह्यो ।

टस हारेर पहिले ब्याटिङको निम्तो पाएको भारतले निर्घारित २० ओभरमा ७ विकेटको क्षतिमा १ सय ७२ रन बनाउन सफल भएको थियो । जवाफमा घरेलु टोली दक्षिण अफ्रिकाले २० ओभरमा ६ विकेटको क्षतिमा केवल १ सय ६५ रन जोड्न सक्यो ।

भारतका लागि उच्च लयमा रहेका ओपनर शिखर धवनले सर्वाधिक ४७ रन जोडेका थिए भने सुरेश रैनाले ४३ रन जोडे । दक्षिण अफ्रिकाका लागि जुनियर डालाले सर्वाधिक ३ विकेट लिए ।

त्यस्तै दक्षिण अफ्रिकाका लागि कप्तान जेपी डुमिनीले सर्वाधिक ५५ जोडे भने क्रिस्टियन जोन्करले ४९ रनको योग्दान दिए । भारतका लागि भुवनेश्वर कुमारले कसिलो बलिङ गर्दै २ विकेट लिएका थिए ।

यसअघि भारतले पहिलो टी-२० २८ रनले जितेको थियो भने दोस्रो खेलमा घरेलु टोली ६ विकेटले विजयी रहेको थियो । यसैगरी दक्षिण अफ्रिकाले टेष्ट श्रृंखला २-१ ले जितेको थियो भने भारतले एक दिवसीय श्रृंखलामा ५-१को फराकिलो जित दर्ता गरेको थियो ।