एजेन्सी- करण केसीको उत्कृष्ट अलराउण्डर प्रर्दशन र बलिङमा सन्दीप लामिछानेले पुन चम्केपछि मलेसियामा जारी विश्व ट्वान्टी–२० एसिया छनोट ‘बी’ तेस्रो खेलमा नेपालले थाइल्यान्डलाई १ सय ४० रनको फराकिलो अन्तरले पराजित गरेको छ । टी– २० क्रिकेटमा यो नेपालको सर्वाधिक फराकिलो अन्तरको जित पनि हो ।

नेपालले दिएको १ सय ७३ रनको लक्ष्य पक्ष्याएको थाइल्यान्ड ८ ओभर ५ बलमा ९ विकेट गुमाउँदै १८ रन जोडेको अवस्थामा पानी परेर खेल रोकिए पछि नेपाल डिएल थर्ड मेथर्डको आधारमा विजयी भएको हो । नेपाली गुग्ली वाइ सन्दीप लामिछाने र तिब्र गतिका बलर करण केसीको बलिङ सामु थाइल्यान्डका कुनै पनि ब्याटम्यानले दोहोरो अंकमा रन जोड्न सकेनन् ।

नेपालकालागि सन्दीप लामिछानेले ५ र करण केसीले ३ विकेट हात पारे । थाइल्यान्डका लागि जुआऊल होक र वंचना उइसुक बनाएको समान ७ रन नै सर्वाधिक रन बन्यो ।

यस अघि बायोमास ओभल क्रिकेट मैदानमा टस हारेर पहिला ब्याटिङ गरेको नेपालका करण केसीले विश्फोटक ब्याटिङ गरेपछि २० ओभरमा ७ विकेटको क्षतिमा १ सय ७२ रन बनाउन सकेको थियो । नेपालका लागि करण केसीले आक्रमक ब्याटिङ गर्दै सम्मान जनक स्थितीमा पुर्याउने काम गरे । अन्तिम ओभरमा लगातार ३ छक्का प्रहार गरेका उनले मात्र १४ बलमा कुल ४ छक्का र २ चौका प्रहार गर्दै ४० रनमा नट आउट रहे ।

त्यस्तै नेपालका लागि दिपेन्द्र सिंह ऐरीले २६ बलमा ३ चौका र १ छक्का प्रहार गर्दै ३०, शरद भेषवाकर २८ बलमा २ चौका प्रहार गर्दै ३४, अनिल कुमार शाहले १७ बलमा ५ चौका प्रहार गर्दै २५ रन बनाउदै आउट भए । त्यस्तै विनोद भण्डारी १५ र आरिफ शेख ८, कप्तान पारस खड्का ५, उप कप्तान ज्ञानेन्द्र मल्ल ७ र सोमपाल कामीले ४ रन बनाउन सके । थाइल्यान्डका पेपुथ सुन्गनार्डले ४ र विष्णनाथ सिंहले २ विकेट लिएका थिए ।