एजेन्सी – आधुनिक युगमा क्रिकेट एक खेलमा मात्र सिमित छैन । क्रिकेटरहरु मैदानमा गरेको प्रदर्शनको आधारमा मैदानबाहिर पनि उत्तिकै व्यस्त रहने गर्छन् ।

मैदानको प्रदर्शनले नै उनीहरुको मैदानबाहिरको कमाईमा असर पर्छ । व्यापारिक प्रायोजनमा क्रिकेट खेलाडीको प्रयोग अहिले बढ्दो छ । कतिपय खेलाडी त क्रिकेट खेलेर भन्दा क्रिकेटबाहिर गरेको कार्यले बढी कमाउने गर्छन् । पछिल्लो समय ट्वान्टी-२० लिगको सहभागिताले पनि क्रिकेटरहरु कमाउन थालेका छन् ।

विश्व क्रिकेटमा सबैभन्दा बढी कमाउने ५ क्रिकेट खेलाडी :

५. सेन वाटसन (३ करोड ५० लाख अमेरिकी डलर)

सेन वाटसनको १४ वर्षे क्रिकेट करिअर चोटले भरिपूर्ण रहयो । सन् २०१६ यता उनले टोलीमा स्थान नै बनाउन सकेनन् । तर उनले त्यसका बाबजुद चेन्नाई सुपर किंग्सलाई उपाधि दिलाउन महत्त्वपूर्ण भूमिका खेले । अस्ट्रेलियाका लागि १ सय ९० वान डे खेल्दै उनले ९ शतक र ३३ अर्धशतकका साथ ५ हजार ७ सय ५७ रन जोडेका छन् । उनले १ सय ६८ विकेट पनि हात पारेका छन् । सिमित ओभर क्रिकेटका वाटसन उत्कृष्ट अलराउन्डरमा पर्छन् ।

४. विरेन्द्र सहवाग (३ करोड ५० लाख अमेरिकी डलर)

विरेन्द्र सहवाग विश्वकै सबैभन्दा विस्फोटक ब्याट्सम्यानको रुपमा चिनिन्छन् । उनी भारतका लागि दुई पटक तेहेरो शतक बनाउने एकमात्र ब्याट्सम्यान हुन् । सहवागले अन्तर्राष्ट्रिय क्रिकेटमा १७ हजारभन्दा बढी रन जोडेका छन् । सन् १९९९ मा पाकिस्तानविरुद्ध डेब्यु गरेयता उनले १६ वर्ष क्रिकेटमा बिताए । सन् २०११ विश्वकप र सन् २००७ मा टि-२० विश्वकप जित्दा उनले महत्त्वपूर्ण भूमिका खेलेका थिए ।

३. युवराज सिंह (४ करोड अमेरिकी डलर)

युवराज सिंह अर्थात ‘सिक्सर किङ’ । सन् २००० मा केन्याविरुद्ध खेल्दै अन्तर्राष्ट्रिय क्रिकेटमा डेब्यु गरेका उनले सन् २००७ को टि-२० विश्वकपमा एकै ओभरमा ६ छक्का प्रहार गरेका थिए । सन् २०११ विश्वकपमा भारतलाई उपाधि दिलाउँदा उनी प्रतियोगिताकै म्यान अफ द सिरिज घोषित भएका थिए । क्यान्सरका कारण केहि समय खेलबाट बाहिर रहेका युवराज अझैपनि क्रिकेटमा छन् । पछिल्लो एक वर्ष टोलीबाहिर रहेका युवराज अहिले घरेलु क्रिकेटमा मिहिनेत गर्दै राष्ट्रिय टोलीमा पुनरागमन गर्ने प्रयासमा छन् ।

धोनी र युवराज

२. महेन्द्रसिंह धोनी (७ करोड अमेरिकी डलर)

धोनी विश्व क्रिकेटका सर्वाधिक चर्चित र सफल क्रिकेट खेलाडीमा पर्छन् । भारतलाई टि-२० विश्वकप र वानडे विश्वकप दिलाउँदा कप्तान रहेका धोनी आक्रामक ब्याटिङका लागि प्रख्यात छन् । उनले सन् २०१३ मा च्याम्पियन्स ट्रफी जित्दै आईसीसीको आयोजनामा भएका तीनै प्रतियोगिता जित्ने एकमात्र कप्तान पनि बनेका थिए । सन् २००४ मा बंगलादेशविरुद्ध डेब्यु गरेका धोनीले सन् २०१९ को विश्वकप खेल्ने योजना बनाइरहेका छन् ।

१. विराट कोहली (९ करोड २० लाख अमेरिकी डलर)

विराट कोहली सबैभन्दा धनि क्रिकेट खेलाडी हुन् । आक्रामक प्रस्तुतिका लागि प्रख्यात रहेका कोहलीले विभिन्न संस्थाहरुको ब्राण्ड एम्बेसेडरको भूमिका निर्वाह गर्दै आएका छन् । सन् २००८ देखि अन्तर्राष्ट्रिय क्रिकेट खेल्न थालेका उनले थुप्रै कीर्तिमान आफ्नो नाम गरेका छन् । वानडे वरियताको शीर्ष स्थानका ब्याट्सम्यान कोहलीले आउने विश्वकपमा भारतलाई उपाधि दिलाउने सपना देखेका छन् । मैदानबाहिर पनि मैदानभित्र जतिकै सफल कोहलीलाई पछाडी पार्न अन्य खेलाडीले निकै मिहिनेत गर्नुपर्ने देखिन्छ ।