काठमाडौं- प्रथम डिएभी अन्तर्राष्ट्रिय आमन्त्रण स्कुल क्रिकेट लिगको उपाधि भारत नयाँ दिल्लीको बालभवन इन्टरनेसनल स्कुलले जितेको छ । बालभवनले बिहीबारको फाइनलमा अर्को भारतकै बाराणसीको आर्यन इन्टनरनेसनल स्कुलाई ५८ रनले पराजित गरेको थियो।
पुल्चोकस्थित इन्जिनियरिङ कलेजको मैदान टस जितेर पहिले ब्याटिङ गरेको बालभवनले २० ओभरमा ९ विकेटको गुमाएर १ सय ३३ रन योगफल तयार पारेको थियो । प्रतिउत्तरमा आयर्नले १५.१ ओभरमा सबै विकेट गुमाउँदा ७५ रनमात्र जोड्न सक्यो । बालभवनका लागि निखित तावरले १९ बलमा ५ चौका र १ छक्काका साथ सर्वाधिक ३२ रन बनाए । इशान सिंहले ३१ बलमा २८ र यश ढोलले २७ बलमा २२ रन जोडे ।
आर्यनका मनीषकुमार पटेलले ३ तथा शुभम बर्मा र प्रशान्त दुवेले समान १ विकेट लिए । १ सय ३४ रनको लक्ष्य पछ्याएको आर्यनलाई सस्तैमा रोक्ने क्रममा अविनाभ भट्ट र कार्तिक साराले समान ४ विकेट लिएपछि टोलीले १५.१ ओभरमा सबै विकेट गुमाएर ७५ रनमात्र बनाउन सक्यो । म्यान अफ दी म्याच कार्तिकले ४ ओभरमा २३ रन खर्चे भने अविनभले ३ ओभरमा १४ रन दिए । टोलीका लागि सक्षम सिंगोराले २ विकेट लिए ।
आर्यनतर्फबाट मनीषले सर्वाधिक २७ यश लखमानीले १० र हेराम्ब मिश्राले ८ रन बनाए । १ सय ४२ रन बनाएका बालभवनका निखिल तावर बेस्ट ब्याट्सम्यान तथा ११ विकेटका नेपाल पुलिस स्कुलका नीरञ्जन अधिकारी वेस्ट बलर घोषित भए । बालभवनका सागर नवाल वेस्ट विकेट किपर र सोही स्कुलका अमन जैनवाल इमर्जिङ खेलाडी छानिए । बुटवलको न्यू होराइजन स्कुल फेयर प्ले र भारत लखनउको सिटी मन्टेश्वरी वेस्ट आउट फिट टोली छानियो । आयर्ननका मनीषकुमार पटेल म्यान अफ दी सिरिज घोषित भए । नेपाल क्रिकेट संघकी प्रमुख कार्यकारी अधिकृत भावना घिमिरेले विजेता टोलीका खेलाडीलाई पुरस्कृत गरिन् ।
