सुबास हुमागाईं, दुबई

युवा ब्याट्सम्यान रोहितकुमार पौडेलले उत्कृष्ट ब्याटिङ प्रदर्शन गर्दै अर्धशतक प्रहार गरेपछि नेपालले दोस्रो ओडीआईमा यूएईलाई २ सय ४३ रनको लक्ष्य दिएको छ ।

आईसीसी एकेडेमी मैदानमा टस जितेर ब्याटिङ थालेको नेपालले रोहितको ५५ रनको मदतले निर्धारित ५० ओभरमा ९ विकेटको क्षतिमा २ सय ४२ रन बनायो । नेपालले यो ओडीआईमा बनाएको सर्वाधिक रन समेत हो । यसै खेलबाट राष्ट्रिय टोलीमा पुनरागमन गरेका रोहितले ४७ औं ओभरको पहिलो बलमा आउट हुनुअघि ५८ बलमा ७ चौका प्रहार गर्दै महत्त्वपूर्ण ५५ रन बटुले ।

त्यसअघि ओपनर ज्ञानेन्द्र मल्ल र विनोद भण्डारीले पहिलो विकेटका १५.३ ओभरमा ६१ रनको साझेदारी गर्दै बलियो सुरुवात दिलाए । १६ औं ओभरमा कट बिहाइन्ड हुनुअघि विनोदले ४६ बलमा २ चौकाको मदतले २१ रन जोडे । अर्का ओपनर ज्ञानेन्द्र पनि ४४ रनमा पेभेलियन फर्किए । यो ओडीआईमा नेपालका लागि सुरुवाती जोडीले गरेको सर्वाधिक साझेदारी पनि हो ।

यस अघि नेदरल्यान्डसँग डेब्यूमा मल्ल र अनिल कुमार शाहले ५८ रनको साझेदारी गरेका थिए । लामो सट प्रहार गर्ने धुनमा ज्ञानेन्द्र जहुर खानको बलिङमा मिड अन क्षेत्रमा समातिए । उनले ६१ बलमा ४ चौका प्रहार गरे । यद्यपी सुरुवात राम्रो गरेको नेपालको मध्यक्रम भने केहि धराशायी देखियो । नेपालले सुरुवाती ५ विकेट ५२ रनको अन्तरमा गुमाएको थियो ।

चौथो नम्बरमा आएका दिपेन्द्रसिंह ऐरी अस्फाक अहमदको बलमा एलबीडब्लु आउट भए । उनले १२ बलमा २ चौकासहित १० रन जोडे । पाँचौ विकेटका रुपमा २७ औं ओभरमा इमरान हैदरले पवनसरार्फलाई ८ रनमा सिपी रिजवानको हातबाट क्याच गराए । पवन पनि ठूलो शट प्रहार गर्ने चक्करमा क्याच आउट भएका थिए । लगत्तै २९ औं ओभरमा कप्तान पारस खड्कालाई हैदरलेनै एलबी डब्लू आउट गर्दै २१ रनमा पेभिलिएन फर्काए ।

त्यसपछि छैटौं विकेटका लागि आरिफ शेख र रोहित कुमार पौडेलले ८२ रनको महत्वपूर्ण साझेदारी गर्दा नेपालले प्रतिस्पर्धात्मक लक्ष्य प्रस्तुत गरेको हो । आरिफ ४५ ओभरको तेस्रो बलमा हैदरको एलबी डब्लूको सिकार हुनु अघि ४९ बलमा २ चौका सहित २९ रनमा आउट भए । त्यस्तै करण केसीले आक्रमक ब्याटिङ गर्दै ११ बलमा २ छक्का सहित १८ रनको योगदान दिए । सोमपाल कामी २ रनमा आउट हुँदा सन्दीप लामिछाने १४ र ललित नारायण राजवंशी ३ रनमा नट आउट रहे ।

यूएईका इमरान हैदर १० ओभरमा ५४ रन खर्चेर ३ विकेट लिए । अमिर हायतले पनि ३ विकेट हात पारे । कप्तान मोहमद नविद, जहुर खान र अस्फाक अहमदले समान १-१ विकेट लिए ।

पहिलो खेलमा ३ विकेटले पराजित भएको नेपालले सिरीज जित्ने आसा कायमै राख्न आजको खेल जित्नै पर्ने दबाब रहेको छ ।