काठमाडौं (हाम्रो खेलकुद) – रुस्लान धनगढी प्रिमियर लिग (डिपीएल) –३ टोली विराटनगर किङ्सले विदेशी खेलाडीको रुपमा दुई भारतीय खेलाडीलाई अनुबन्धित गरेको छ ।

विराटनगरले मंगलबार प्रेस विज्ञप्ती जारी गर्दै भारतको प्रतिष्ठित प्रतियोगिता रन्जी ट्रफी खेलिसकेका प्रथम श्रेणी क्रिकेटर अभिनाश यादब र शिभकान्त शुक्लालाई टिममा अनुबन्ध गरेको उल्लेख गरेको छ । दुवै खेलाडीले रेलवेजको लागि भारतको प्रतिष्ठित रन्जी ट्रफी प्रतियोगिता खेलिसकेका छन् ।

३२ वर्षीय अभिनाश यादब बाँया हाते स्पिनर हुन् । उनले २५ प्रथम श्रेणी क्रिकेटमा ७६ विकेट लिईसकेका छन् । यस्तै ३३ वर्षीय शिभकान्त शुक्ला देब्रे हाते ब्याट्सम्यान हुन् । शिभकान्तले ८५ प्रथम श्रेणी क्रिकेटमा ४,१९८ रन बनाएका छन् ।

बिराटनगर किंग्सको रणनीतिक खेलाडीको रुपमा करन केसी छन् । टिमका अन्य खेलाडीमा आरिफ शेख, कुशल भुर्तेल, पृथु बास्कोटा, किशोर महतो, सुशन भारी, हरिशंकर शाह, मोहम्मद संसाद शेख, राजेश पुलामी मगर, अर्जुन अधिकारी, अमित गुरुङ, तृतराज दास र सुवास ऐर छन् ।

तेस्रो संस्करणको डीपीएल २६ माघबाट शुरु हुदैछ । प्रतियोगितामा विभिन्न ६ शहरका ६ फ्रेन्चाइज टोली सहभागी छन् । राउन्ड रोविन लिगका आधारमा हुने प्रतियोगिताको शीर्ष चार टोलीले प्ले अफमा स्थान बनाउनेछन ।