दुबई (एजेन्सी) – नेपाल अन्तर्राष्टिय क्रिकेट परिषद (आईसीसी) टि ट्वान्टीको वरियतामा समावेश भएको छ । संयुक्त अरब इमिरेट्स (युएई)सँग आइतबार सम्पन्न तीन टि ट्वान्टीको सिरीज २(१ ले जितेसँगै नेपाललाई आईसीसीको वरियतामा समावेश गरिएको हो ।
आईसीसीले सोमबारसार्वजनिक गरेको टि ट्वान्टी वरियतामा नेपालले खेलका ७ खेलमा ३ सय ३ अंक र ४३ अंक रेटिङ छ । नेपाल वरियताको १४ औ स्थानमा रहेको छ । यूएई,हङकङ,ओमान रआयरल्यान्ड नेपाल भन्दापछि छन् ।
नयाँ वरियता अनुसार पाकिस्तान शीर्ष स्थानमा रहँदा भारत दोस्रो र दक्षिण अफ्रिका तेस्रो स्थानमा छ । एसोसिएट राष्ट्रका स्कटल्यान्ड ११ र नेदरल्यान्ड १३ औं स्थानमा छन् । सन् २०१४ मा टि ट्वान्टी विश्वकपमा भाग लिएको नेपाली टोलीले त्यसै बर्ष जुनमा टि ट्वान्टीको अन्तर्राष्ट्रिय मान्यता पाएको थियो ।
२०१५ टि ट्वान्टी विश्वकप छनोटमा खराब प्रर्दशन गर्दै समुह चरणबाट बाहिरिएपछि नेपालले टि ट्वान्टीको मान्यता गुमाएको थियो । गत मार्च १५ मा चार वर्षका लागि ओडीआई मान्यता पाएसँगै नेपालले पुनः टि ट्वान्टीको मान्यता प्राप्त गरेको थियो ।
