धनगढी (हाम्रो खेलकुद) – भारतीय खेलाडी अंकित दबासको अलराउन्ड प्रदर्शनमा काठमाडौं गोल्डेन्सले महेन्द्रनगर युनाइटेडलाई ७ रनले पराजित गर्दै तेस्रो रुस्लान धनगढी प्रिमियर लिगमा लगातार दोस्रो जित दर्ता गरेको छ । खेलमा निर्णायक भूमिका खेलेका अंकित लगातार दोस्रो खेलमा म्यान अफ द म्याच भए ।

काठमाडौंले प्रस्तुत गरेको १ सय ३५ रनको लक्ष्य पछ्याएको महेन्द्रनगरले २० ओभरमा ८ विकेट गुमाउदै १ सय २७ रन मात्र बनाउन सक्यो । अन्तिम ओभरमा जितको लागि महेन्द्रनगरलाई १२ रन चाहिएको थियो । तर योगेन्द्रसिंह कार्कीले ५ रन खर्चेर १ विकेट लिएपछि काठमाडौंको लगतार दोस्रो जित हात पारेको हो । महेन्द्रनगरका लागि अमर सिंह राउटेलाले २७ बलमा २ चौका प्रहार गर्दै २८ रनमा अविजित रहे ।

महेन्द्रनगरलले पहिलो ओभरको दोस्रो बलमै ओपनर मोहम्मद नाविदलाई गुमायो । नन्दन यादवले नाविदलाई बाल्ड गरे । दोस्रो ओभरको चौथो बलमा राशिद खानले अर्का ओपनर दिलिप नाथलाई एलवी डब्लूको धरापमा पार्दै १ रनमा पेभिलिएन फर्काए ।

पाँचौ ओभरको तेस्रो बलमा आक्रमक रुपमा ब्याटिङ गर्न खोजि रहेका आरिफ शेखलाई ललिलत नारयण राजवंशीले १८ रनमा क्याच आउट गराए । विक्रम भुषालको हातबाट क्याच हुनु अघि आरिफले १० बलमा २ छक्का र १ चौका प्रहार गरे । चौथो विकेटका रुपमा आनन्दले १५ रन जोड्दै पेभिलिएन फर्के । १० औं ओभरको तेस्रो बलमा अंकित दवासले क्याच आउट गराउनु अघि कप्तान शरद भेषवाकर २४ बलमा ३ चौका सहित २३ रन जोडे । महेन्द्रनगरको विकेट पतन निरन्तर जारी रह्यो ।

छैटौं विकेटका रुपमा कुशल मल्ल ६ रनमा आउट भए । सातौ विकेटको रुपमा रोहित कुमार पौडेल १० रनमा आउट भए । रोहित र मल्ल दुबैलाई राशिद खानले विकेटकीपर अनिल कुमार शाहबाट क्याच गराउँदै पेभिलिएन फर्काएपछि महेन्द्रनगर १३ ओभरमा ८६-७ को कमजोर अवस्थामा पुगेको थियो । सिद्धान्त ९ रनमा आउट भए ।

काठमाडौंका लागि राशिद खानले ४ ओभरमा १७ रन खर्चेर ३ विकेट लिए । त्यस्तै अंकित दवासले ४ ओभरमा २८ रन खर्चेर २ विकेट लिए । ललितनारयण राजवंशीले र नन्दन यादवले समान एक एक विकेट आफ्ना् नाममा लेखाए ।

त्यसअघि टस हारेर ब्याटिङको निम्तो पाएको काठमाडौंले अंकित दबासको उत्कृष्ट ब्याटिङसँगै निर्धारित २० ओभरमा ५ विकेट गुमाउँदै १ सय ३४ रन जोड्यो । दुवै ओपनर पेभेलियन फर्केपछि दोस्रो ओभरमा क्रिजमा आएका अंकितले नट आउट ६५ रन जोडे । उनले ५५ बलमा ५ चौका र ३ छक्का प्रहार गरे ।

अंकितले योगेन्द्रसिंह कार्कीसँग मिलेर छैटौं विकेटका लागि अन्तिम ७ ओभरमा नटआउट ७६ रनको साझेदारी गरे । योगेन्द्रले १४ बलमा १ चौका र १ छक्का प्रहार गर्दै २२ रन जोडेर राम्रो साथ दिए । यी दुईको उत्कृष्ट साझेदारीले काठमाडौंले जारी प्रतियोगिताको सर्वाधिक योगफल खडा गर्न सफल रहयो ।

काठमाडौंले खराब सुरुवातलाई निरन्तरता दिंदै दुवै ओपनरलाई सुरुवाती दुई ओभरमा गुमाएको थियो । अनिलकुमार शाह पहिलो ओभरको अन्तिम बलमा ६ रन जोड्दै मोहमद नविदको बलमा एलबीडब्लु भए । लगत्तै दोस्रो ओभरको पाँचौ बलमा अभिनाश बोहोराले गौरव तोमरलाई १ रनमा बोल्ड गरे ।

कप्तान ज्ञानेन्द्र मल्लले सम्हालिएर खेल्ने प्रयास गरेपनि १४ रन जोडेको स्थितिमा सातौं ओभरमा सागर ढकालको बलमा कट बिहाईन्ड भए । अमरसिंह राउटेलाले १३ औं ओभरको दोस्रो बलमा महबुब आलम र छैटौं बलमा सोनु तामाङलाई बोल्ड गरेपछि काठमाडौं ५८-५ को कमजोर अवस्थामा पुगेको थियो । आलमले १९ बलमा २ चौका सहित १३ रन जोड्दा सोनु १ रनमा आउट भए ।

महेन्द्रनगरका लागि अमरले ४ ओभरमा २६ रन खर्चेर २ विकेट लिए । अभिनास बोहोरा,सागर ढकाल र मोहम्मद नाविदले समान एक-एक विकेट लिए ।