विनोदबाबु रिजाल, भरतपुर
१६ औं मेयर्स चितवन च्याम्पियनसीप ट्रफीको फाइनलमा चितवन र बारा भिड्ने भएका छन् । समूह चरणको अन्तिम खेलमा चितवन क्रिकेट क्लब र कलैया क्रिकेट क्लबले आ-आफ्नो खेल जित्दै उपाधि भिडन्त पक्का गरेका हुन् ।
आइतबारको पहिलो खेलमा चितवनले धनगढी क्रिकेट एकेडेमीलाई ५ विकेटले पराजित ग¥यो । पहिले ब्याटिङ गरी धनगढीले दिएको १३४ रनको लक्ष्य चितवनले १७ ओभरमा ५ विकेट गुमाएर पूरा ग¥यो । धनगढीले १८ ओभरमा झारिएको इनिङमा ८ विकेट गुमाएर १३३ रन बनाएको थियो । उसका लागि राजु रिजालले ६२ रनको योगदान दिए । जवाफमा आएको चितवनका लागि आकाश थापाले ६७ रनको नटआउट पारी खेलेर टिमलाई जित दिलाए । उनी म्यान अफ दी म्याच बने ।
दोस्रो खेलमा कलैयाले काठमाडौंको ग्रेट हिमालयन क्रिकेट एकेडेमीलाई २६ रनले हरायो । पहिले ब्याटिङ गरी कलैयाले दिएको १६८ रनको लक्ष्य पछ्याएको ग्रेट हिमालयनले १९.३ ओभरमा अलआउट हुँदै १४१ रनमात्रै बनाउन सक्यो । खेलको म्यान अफ दी म्याच बनेका अमित श्रेष्ठलाई धुर्मुस–सुन्तली फाउण्डेसनका अध्यक्ष सीताराम कट्टेल धुर्मुसले ट्रफी हस्तान्तरण गरे ।
चितवन क्रिकेट संघले भरतपुर महानगरपालिकासँगको सहकार्यमा आयोजना गरेको प्रतियोगिताको फाइनल सोमबार बिहान १० बजे हुनेछ । जित्ने टोलीले नगद १ लाख तथा उपविजेताले ५० हजारसहित ट्रफी पाउने छन् ।
