काठमाडौं (हाम्रो खेलकुद) – नेपाली यू१९ राष्ट्रिय क्रिकेट टोली अप्रिल १२ देखी १८ सम्म मलेसियामा हुने विश्वकप छनोटको लागि टियू क्रिकेट मैदानमा अभ्यासरत छ ।
राष्ट्रिय टोलीबाट खेलिसकेका रोहित कुमार पौडेल, सन्दीप जोरासँगै डेब्यूको पर्खाईमा रहेका भिम सार्की, राशिद खान, सागर ढकाल लगायत घरेलु लिगमा उत्कृष्ट प्रर्दशन गर्दै आएका खेलाडी प्रशिक्षणमा छन् । राष्ट्रिय टोलीको समेत अनुभव बोकिसकेका भरपर्दा युवा ब्याट्सम्यान रोहितले नेपालले विश्वकप खेल्नेमा आफू विश्वस्त रहेको बताए । ‘हामी प्रतियोगितामा पनि बलियो टिम हौं । सिनियर खेलाडीले भन्दा पनि नयाँ खेलाडीले राम्रो गरिरहेका छन् । मेरो पनि राम्रो भइरहेको छ । अभ्यासको लागि भारत जाँदैछौं । त्यहाँ स्टेट टिमहरुसँग खेल्न पाइन्छ, हाम्रो लागि पनि अवसर हो, ‘रोहितले हाम्रोखेलकुदसँग भने । प्रतियोगितमा मैदानमा सबै एकै भएपनि कागजी रुपमा नेपालनै बलियो रहेको दावी समेत गरे ।
रोहितले छनोटमा आफूले शतक प्रहार गर्न सक्ने क्षमता रहेको बताएका छन् । राष्ट्रिय टोलीमा पनि उत्कृष्ट प्रर्दशन गरिसकेको खेलाडी, के यू१९ छनोटमा शतक देख्न पाइन्छ भन्ने प्रश्नमा रोहितले सकिन्छ किन नसक्नु नि भन्ने जवाफ दिएका हुन् ।
त्यस्तै यू१९ टिमका कप्तान समेत रहेका आशिफ शेखले नेपालको लक्ष्य विश्वकप रहेको बताए । ‘ टिम राम्रो र सन्तुलित छ । यसअघि पनि हाम्रो टिम राम्रो थियो तर दुर्भाग्य भन्नुपर्छ हामी त्यो विश्वकपमा खेल्न पाएनौं’,शेखले भने,’ यसपटक हामीले विश्वकपमा नै छनोट हुने लक्ष्य लिएर अगाडी बढेका छौं ।’
यू१९ टोलीका प्रमुख प्रशिक्षक विनोद दासका अनुसार बिहीबार अन्तिम अभ्यास खेलपछि भारत भ्रमणको लागि १८ सदस्य टोली घोषणा हुने छ । भारतको आन्ध्रप्रदेश भ्रमणमा गरेको प्रर्दशनको आधारमा विश्वकप छनोट खेल्ने १४ सदस्य टोली घोषणा हुने छ । नेपाल सहित कुवेत, मलेसिया, यूएई, सिंगापुर र ओमान रहेको प्रतियोगितामा शीर्ष टोलीले सन् २०२० मा दक्षिण अफ्रिकामा हुने विश्वकप खेल्न पाउने छ ।
