एजेन्सी – मध्यक्रमका ब्याट्सम्यान ह्यारिस सोहेलले वान डे करियरको पहिलो शतक प्रहार गरेपछि पाँच खेलको वान डे सिरिज अन्तर्गत पहिलो खेलमा पाकिस्तानले पाहुना टोली अष्ट्रेलियालाई २ सय ८१ रनको लक्ष्य दिएको छ ।
शारजाह क्रिकेट स्टेडियममा टस जितेर पहिला ब्याटिङ थालेको पाकिस्तानले निर्धारित ५० ओभरमा ५ विकेटको क्षतिमा २ सय ८० रन बनायो । पाकिस्तानको लागि मिडिल अडरका ह्यारिस सोहेलले करियरको पहिलो वान डे शतक प्रहार गर्दै १ सय १५ बलमा ६ चौका र १ छक्का सहित १ सय १ रनमा अविजित रहे ।
त्यस्तै ओपनर शन मसूद ४०, ईमाम उल हक १७, उमर अकमल ४८, कप्तान शोएब मालिक ११ र फहिम अशरर्फ २८ रनमा आउट भए । ईमाद वासिमले १३ बलमा ४ चौका र १ छक्का प्रहार गर्दै २८ रनमा नट आउट रहे । अष्ट्रेलियाका लागि नाथन कुल्टर नाईलले २,नाथन लायन,ग्लेन म्याक्सवेल र झेय रिचड्सनले समान एक एक विकेट लिए ।
