एजेन्सी – कप्तान आरोन फिन्चले उत्कृष्ट शतक प्रहार गरेपछि पाकिस्तानसँगको पहिलो वान डे खेलमा पाहुना टोली अष्ट्रेलियाले सानदार जित हात पारेको छ ।
शुक्रबार राती शारजाह क्रिकेट स्टेडियम युएईमा सम्पन्न खेलमा अष्ट्रेलियाले पाकिस्तानलाई ८ विकेटले पराजित गरेको छ । २ सय ८१ रनको विजयी लक्ष्य पछ्याएको अष्ट्रेलियाले ४९ ओभरमा २ विकेटको क्षतिमा पुरा गर्यो । अष्ट्रेलियाको जितमा कप्तान आरोन फिन्च १ सय ३५ बलमा ४ छक्का र ८ चौका प्रहार गर्दै १ सय १६ रनमा क्याच आउट भए । फिन्चको यो वान डे करियरको १२ औं शतक हो ।
शन मार्श १ सय २ बला ४ चौका र २ छक्का प्रहार गर्दै ९१ रनमा अविजित रहँदा ओपनर उस्मान ख्वाजा २४ रनमा आउट भए । त्यस्तै पिटरहेन्डस्कम्व ३० रनमा नट आउट रहे । सहज जित दिलाउन फिन्च र मार्शले दोस्रो विकेटका लागि १ सय ७२ रनको साझेदारी गरेका थिए । पाकिस्तानका लागि फहिम असरार्फ र मोहम्मद अब्बासले समान एक विकेट हात पारे । अन्य कुनै पनि बलरले विकेट लिन सकेनन् ।
त्यसअघि टस जितेर पहिला ब्याटिङ थालेको पाकिस्तानले निर्धारित ५० ओभरमा ५ विकेटको क्षतिमा २ सय ८० रन बनायो । पाकिस्तानको लागि मिडिल अडरका ह्यारिस सोहेलले करियरको पहिलो वान डे शतक प्रहार गर्दै १ सय १५ बलमा ६ चौका र १ छक्का सहित १ सय १ रनमा अविजित रहे । त्यस्तै ओपनर शन मसूद ४०, ईमाम उल हक १७, उमर अकमल ४८, कप्तान शोएब मालिक ११ र फहिम अशरर्फ २८ रनमा आउट भए ।
ईमाद वासिमले १३ बलमा ४ चौका र १ छक्का प्रहार गर्दै २८ रनमा नट आउट रहे । अष्ट्रेलियाका लागि नाथन कुल्टर नाईलले २,नाथन लायन,ग्लेन म्याक्सवेल र झेय रिचड्सनले समान एक एक विकेट लिए । यो जितसागै पाँच ओडीआई सिरिजमा अष्ट्रेलियाले १-० को अग्रता लिएको छ । दोस्रो खेल आगमी आईतबार हुने छ ।
