काठमाडौं (हाम्रो खेलकुद) – राष्ट्रिय टोलीका स्टार खेलाडीले भरिपूर्ण गोल्डेन गेट इन्टरनेशनल कलेजलाई पराजित गर्दै ट्रीटन इन्टरनेशनल कलेजले गोल्डेन गेट कलेज क्रिकेट लिग ट्वान्टी ट्वान्टीको उपाधि जितेको छ । जितसँगै ट्रिटनले २ लाख २२ हजार दुई सय २२ रुपैया प्राप्त गर्यो भने गोल्डेन गेटले एक लाख ११ हजार एक सय ११ रुपैयामा चित्त बुझायो ।

त्रिवि क्रिकेट मैदानमा आइतबार भएको निकै नै रोमाञ्चक फाइनलमा ट्रिटनले गोल्डेन गेटलाई ५ विकेटले पराजित गर्यो । टस हारेर पहिलो ब्याटिङ्ग गरेको गोल्डेन गेटले दिपेन्द्र सिँह ऐरिको अद्र्धशतकको मद्दतमा ७ विकेट गुमाउदै १ सय २६ रन बनायो । जवाफमा प्रदिप ऐरिले अविजित ४५ र बिक्रम सोबले ६ बलमा महत्वपूर्ण १७ रनको इनिङ्गस खेलेपछि ट्रिटनले १९ दशमलव दुई ओभरमा पाँच विकेटको क्षतिमा लक्ष्य प्राप्त गर्यो ।

सामान्य लक्ष्य पछ्याउने क्रममा ट्रिटनले १६ रनमै दुई विकेट गुमाएको थियो तर प्रदिपले आदिल खानसँग तेश्रो विकेटका लागि ६५ रनको महत्वपूर्ण साझेदारी गर्दै टिमलाई खेलमा कायम राखेका थिए । राष्ट्रिय टोलीमा भर्खरै प्रवेश गरेका अविनाश बोहोराले आदिल र बिनोद भण्डारी (११) लाई बोल्ड गरे भने किरण ठगुन्ना अमर सिँह रौटेलाको बलमा आउट भएपछि गोल्डेन गेट खेलमा फर्किएको थियो ।

अन्तिम ८ बलमा १५ रन चाहिएको अवस्थामा बिक्रमले १९ औं ओभरको अन्तिम दुई बलमा अविनाशलाई छक्का प्रहार गरेपछि ट्रिटनका लागि जित सहज बनेको थियो । अन्तिम ओभरको पहिलो दुई बलमै उसले जित आत्मसात गर्यो  । ट्रिटनका लागि प्रदिप ४५ बलमा ४५ रनमै नटआउट रहे । उनले तीन चौका प्रहार गरे । प्रतियोगिताकै उत्कृष्ट ब्याट्स्म्यान घोषित भएका आदिलले दुई चौका र दुई छक्का प्रहार गर्दै ३२ बलमा ३३ रन बनाए । नन्दन यादव र दिपेन्द्रले गोल्डेन गेटका लागि पहिलो दुई विकेट लिएका थिए ।

यसअघि गोल्डेन गेटले पनि खराब शुरुवात गर्दै पहिलो ८ रन भित्र शरद भेषावकर र अनिल कुमार साहको विकेट गुमाएको थियो । दिपेन्द्रले तेश्रो विकेटका लागि सुमित महर्जनसँग ४२ रनको साभेदारी गर्दै टिमलाई सम्हालेका थिए । सुमितले २४ बलमा दुई चौका र एक छक्का प्रहार गर्दै २० रन बनाए । १८ औं ओभरमा आउट भएका दिपेन्द्रले ५० बलमा पाँच चौका र दुई छक्का प्रहार गर्दै ६१ रन बनाएका थिए । प्रतियोगितामा एक शतक पनि प्रहार गरेका दिपेन्द्रले दोश्रो अद्र्धशतक बनाएका हुन् ।

दिपेन्द्र र सुमित बाहेक गोल्डेन गेटका लागि जितेन्द्र सिँह ठकुरी (१६) र सोनु तामाङ्ग (११ नटआउट) ले दोहोरो अंकमा रन बटुलेका थिए । म्यान अफ द फाइनल बिक्रमसँगै ललित नारायण राजबंशी र अरुण ऐरिले ट्रिटनका लागि दुई–दुई विकेट लिएका थिए ।

प्रतियोगिता भर सान्दार ब्याटिङ्गका साथै उत्कृष्ट बलिङ्ग पनि गरेका दिपेन्द्र म्यान अफ द सिरिज घोषित भए । उनले २५ हजार रुपैया प्राप्त गरे । यस्तै १० विकेट लिएका काठमाडौं युनिभर्सिटीका रुपेश श्रीवास्तव उत्कृष्ट बलर घोषित भए । आदिल र उनले जनही १० हजार प्राप्त गरे । युनिभर्सिटि क्रिकेट क्लबको आयोजनामा भएको प्रतियोगितामा कुल १२ टिमको सहभागिता रहेको थियो ।