काठमाडौं (हाम्रो खेलकुद) – ओपनरद्वय दीपक बोहोरा र आईश भट्टराईको उत्कृष्ट ब्याटिङसँगै प्रदेश ३ ले यू-१६ क्रिकेट लिग प्रतियोगितामा विजयी सुरुवात गरेको छ ।

किर्तिपुरस्थित टीयू क्रिकेट मैदानमा मंगलबार प्रदेश ३ ले प्रदेश ४ लाई ९० रनको फराकिलो अन्तरले पराजित गर्यो । टस जितेर पहिलो ब्याटिङ रोजेको प्रदेश ३ ले निर्धारित ३० ओभरमा ६ विकेट गुमाउँदै २ सय १० रन जोड्यो । दीपक र आईश अर्धशतक प्रहार गर्दै प्रदेश ३ लाई उत्कृष्ट सुरुवात दिलाएका थिए । पहिलो विकेटका लागि १ सय ४ रन जोडेपछि दीपक अभिषेक थापाको बलमा कट बिहाइन्ड भए । उनले ३८ बलमा ९ चौकासहित ५२ रन जोडे । लगत्तै अभिषेककै अर्को बलमा अशोक पौडेल पनि विकेटकिपर अर्जुन कुमालको हातबाट नै समातिए ।

त्यसपछि क्रिजमा आएका प्रशान्त कामतले पनि पहिलो बलमै आउट हुनबाट जोगिए । विकेटकिपरले क्याच छोड्दा प्रशान्त जोगिएका थिए । उनले आईशसँग तेस्रो विकेटका लागि ५८ रनको साझेदारी गरे । २५ औं ओभरमा आदित्य थापाको बलमा बोल्ड हुनुअघि म्यान अफ द म्याच घोशित आईशले ७१ बलमा १० चौका प्रहार गर्दै ८२ रन जोडे । प्रशान्त ४९ बलमा २ चौकासहित ३२ रनमा पेभेलियन फर्किए । अभिषेक उपाध्यायले १९ तथा कृष कार्कीले नटआउट १२ रनको योगदान दिए । प्रदेश ४ का लागि कप्तान अभिषेक र रोशन न्यौपानेले २-२ तथा आदित्यले १ विकेट लिए ।

जवाफमा प्रदेश ४ ले ३० ओभरमा ६ विकेटको नोक्सानीमा १ सय २० रनमात्र जोड्न सक्यो । ओपनर अर्जुन कुमालले ३८ रन जोड्नुबाहेक अन्यले उल्लेख्य योगदान दिन सकेनन् । अर्जुनले ५३ बलमा ५ चौका प्रहार गरे । सिब्रिन श्रेष्ठ ८, सोहेल कुँवर १, कप्तान अभिषेक थापा १७ तथा शरद तिवारी र रोशन न्यौपाने १०-१० रनमा आउट भए । आदित्य थापा १४ र मदन सुवेदी ११ रनमा नटआउट रहे । प्रदेश ३ का लागि तिलक भण्डारीले २ तथा विवेक दराई, आईश भट्टराई र दीपक बोहोराले १-१ विकेट लिए ।

चैत्र १९ देखि २५ सम्म चल्ने प्रतियोगितामा ७ प्रदेशका टोलीले सहभागिता जनाउनेछन् । प्रतियोगिताका ७ प्रदेशलाई दुई समुहमा विभाजन गरिएको छ । प्रत्यक समुहका शीर्ष दुई टोली सेमिफाइनल पुग्नेछन् । यसै अप्रिल १८ देखि २९ सम्म थाईल्यान्डमा हुन लागेको एसीसी यू-१६ इस्टर्न रिजनको लागि यसै प्रतियोगिताबाट खेलाडी छनोट गरिनेछ । प्रारम्भिक छनोटमा २५ खेलाडी र त्यसपछि १४ खेलाडी अन्तिम टोलीमा छनोट हुनेछन् ।

प्रतियोगिताको ग्रुप ए मा प्रदेश नम्बर ३, प्रदेश नम्बर ४,प्रदेश नम्बर ५ र प्रदेश नम्बर ६ रहेका छन् । समहु बी मा प्रदेश नम्बर १,प्रदेश नम्बर २, प्रदेश नम्बर ७ छन् । खेल विहान ८ र दिउँसो १२ बजे देखी टियु क्रिकेट मैदानमा सुरु हुनेछ ।

युवा तथा खेलकुद मन्त्रालयको आयोजनामा राष्ट्रिय खेलकुदको परिषदको समन्वयमा हुने प्रतियोगिताको विजेताले १ लाख ५० हजार बराबरको खेल सामग्री प्राप्त गर्नेछ भने उपविजेताले ७५ हजार बराबरको खेलकुद सामग्री पाउनेछ । प्रतियोगिताको व्यास्थापन मदन भण्डारी स्पोर्ट्स एकेडेमीले गरेको छ  ।