काठमाडौं (हाम्रो खेलकुद) – नेपाली राष्ट्रिय पुरुष क्रिकेट टोलीका बलर करण केसीले प्रधानमन्त्री कप एकदिवसीय क्रिकेटको तेस्रो संस्करण आर्मीबाट खेल्ने भएका छन् । आर्मीले बिहीबार पक्का गरेको टोलीमा विनोद भण्डारी कप्तान रहेका छन् । आर्मीले अघिल्लो दुवै संस्करणमा फाइनल यात्रा तय गरेको थियो ।

करणले आर्मीसँग खेल्ने पक्का भएको कप्तान विनोद भण्डारीले जानकारी दिए । करणले एपीएफ छाड्ने भएसँगै गण्डकी प्रदेशबाट खेल्ने सम्भावना पनि रहेको थियो । अब करणले शुक्रबार हुने उद्घाटन खेलमा प्रदेश २ विरुद्ध खेल्नेछन् । करणले गत सिजन एपीएफबाट खेल्दै ६ खेलमा ११ विकेट लिएका थिए । एपीएफले फाइनलमा त्रिभुवन आर्मीलाई पराजित गर्दै उपाधि जितेको थियो । करणले फाइनलमा ३/३८ को उत्कृष्ट प्रदर्शन गरेका थिए ।

आर्मीले आठौं राष्ट्रिय खेलकुदमा छनोट गरेको टोलीबाट दुई खेलाडी परिवर्तन गरेको हो । चोटका कारण विक्रम सोब टोलीमा छैनन् भने राहुल विक पनि टोलीबाट बाहिरिएका छन् । करणसँगै लोकेन्द्र चन्द टोलीमा समेटिएका छन् । करणसँगै राष्ट्रिय टोलीका अर्का तीव्र गतिका बलर सोमपाल कामी, रोहितकुमार पौडेल, कप्तान विनोद, भीम सार्की पनि आर्मीबाट खेल्दैछन् ।

आर्मीको अन्तिम टोली :
१. विनोद भण्डारी (कप्तान)
२. सोमपाल कामी
३. राजु रिजाल
४. हरिबहादुर चौहान
५. भीम सार्की
६. जितेन्द्र मुखिया
७. सुशन भारि
८. साहब आलम
९. कुशल मल्ल
१०. राजेश पुलामी मगर
११. रोहित कुमार पौडेल
१२. करण केसी
१३. हरिकृष्ण झा
१४. लोकेन्द्र चन्द