काठमाडौं (हाम्रो खेलकुद) – नेपाली राष्ट्रिय क्रिकेट टोलीबाट प्रतिनिधित्व गरिसकेका युवा ब्याट्सम्यान सिन्द्धात लोहनी केहि समय मैदानबाहिर रहने भएको छन् ।
राजधानीमा जारी प्रधानमन्त्री कप अन्तर्गत शुक्रबार टियू क्रिकेट मैदानमा कर्णाली प्रदेशविरुद्ध खेलको दौरानमा सिद्धान्त घाइते हुन पुगेका थिए । उक्त खेलको ४२ औं ओभरको दोस्रो बलमा ६३ रनमा खेलिरहेको अवस्थामा रन लिने क्रममा खुट्टामा चोट लागेपछि सिद्धान्त मैदानबाट बाहिरिएका थिए । डाक्टरको सल्लाहअनुसार सिद्धान्तको लिगामेन्टको अप्रेशन गर्नुपर्ने भएको छ ।
‘एक दुई हप्तामा लिगामेन्टको शल्यक्रिया गर्छु । शल्यक्रिया भएको दिनबाट कम्तिमा ६ हप्ता आराम गर्नु पर्ने हुन्छ । यो समयसम्म मैदान बाहिर नै रहनेछु’,सिद्धान्तले हाम्रो खेलकुदलाई भने । उनले पूर्ण रुपमा मैदानमा फर्कन २-३ महिना लाग्ने बुझिएको छ ।
यदि अहिले शल्यक्रिया गरिएन भने पछि गाह्रो हुन सक्ने डाक्टरको सल्लाह अनुसार शल्यक्रिया गर्न लागेको उनले बताए । सिद्धान्तले वीर हस्पिटलमा आफ्नो खुट्टाको जाँच गराएका थिए । सिद्धान्तले खुट्टामा चोटका कारण प्रदेश २ विरुद्धको अन्तिम खेल गुमाएका थिए । पीएम कपमा यस संस्करणमा सिद्धान्तले ३ खेलमा ७१ रन जोडे ।
सन् २०१५ मा आईसीसी टी-ट्वान्टी विश्वकप छनोटमा सिद्धान्त लोहनीले जर्सीविरुद्ध हेलिकप्टर शट प्रहार गरेपछि चर्चाको शिखर चुमेका थिए । त्यसयता भने राष्ट्रिय टोलीमा स्थान बनाउन सकेका छैनन् । घरेलु क्रिकेटमा पनि उनले निरन्तर राम्रो प्रदर्शन गर्न संघर्ष गरिरहेका छन् ।
