एजेन्सी – मलेसियामा ३० जुन देखी १० जुलाई सम्म चल्ने एसीसी यू-१९ इस्टर्न रिजन २०१९ प्रतियोगिताको खेल तालिका सार्वजनिक भएको छ ।
मंगलबार एसिन क्रिकेट काउन्सिलले दुई समुहमा विभाजन गर्दै खेल तालिका सार्वजनिक गरेको हो । सार्वजनिक तालिकामा नेपाल,सिंगापुर,म्यानमार र चीन रहेका छन् । नेपाल तुलानात्मक रुपमा कमजोर टोलीसँग परेको छ । समुह बी मा हङकङ,थाईल्यान्ड,भुटान,आयोजक मलेसिया रहेका छन् ।
नेपालले पहिलो खेल जुलाई २ मा म्यानमारसँग खेल्ने छ । त्यस्तै ५ जुलाईमा सिंगापुर,६ जुलाईमा चीनसँग प्रतिस्पर्धा गर्ने छ । दुवै समूहका शीर्ष दुई टोलीले जुन ८ मा हुने सेमिफाइनलमा प्रतिस्पर्धा गर्नेछन् । फाइनलमा ९ जुलाईमा हुने छ । नेपालले यस प्रतियोगिताको लागि छिट्टै टोली घोषणा गर्नेछ । यसअघि यू-१९ विश्वकप छनोटका लागि टोलीको कप्तानी रोहितकुमार पौडेलले गरेका थिए ।
प्रतियोगिताको विजेताले श्रीलंकामा हुने यू-१९ एसिया कपमा सहभागिता जनाउनेछ । यस प्रतियोगिताको विजेतासँगै भारत, पाकिस्तान, बंगलादेश, श्रीलंका, अफगानिस्तान, यूएई र कुवेतले प्रतियोगितामा सहभागिता जनाउने पक्का भइसकेको छ । प्रतियोगिता २८ अगस्टदेखि ८ सेप्टेम्बरसम्म संचालन हुनेछ ।
