काठमाडौं (हाम्रो खेलकुद) – ओपनर रित गौतमको अर्ध शतकमा नेपालले एसीसी यू१९ एसिया कप क्रिकेट प्रतियोगितामा श्रीलंकालाई १ सय ६० रनको लक्ष्य दिएको छ ।

कोलोम्बोमा टस जितेर पहिला ब्याटिङ गर्ने निर्णय लिएको नेपालले निर्धारित ४२ ओभरमा ९ विकेट गुमाउँदै १ सय ५९ रन बनायो । वर्षाको कारण केहि समय खेल रोकिदा ५० ओभरबाट झारिएर ४२ मा बनाईएको थियो ।

ओपनर रित गौतमले सर्वाधिक ५४ रनको योगदान दिए । ३० ओभरको पहिलो बलमा क्याच आउट हुनुअघि रितले ८६ बलमा ४ चौका प्रहार गरे । रितले ७४ बलमा अर्ध शतक पुरा गरेका थिए ।

कप्तान रोहित कुमार पौडेलले ८० बलमा १ चौका सहित ४७ रन जोडे । ३५ ओभरको चौथो बलमा एशियान डानियलले आफै क्याच लिदै आउट गरेपछि रोहित अर्ध शतक बनाउन ३ रनले चुकेका थिए ।

खराब सुरुवात गरेको नेपाललाई रित र रोहितले तेस्रो विकेटका लागि ९१ रनको साझेदारी गर्दै इनिङ उकासेका थिए । नेपालका ७ ब्याट्सम्यानले दोहोरो अंकमा रन बनाउन सकेनन् ।

३६ ओभरको पहिलो बलमा हरि बहादुर चौहान १२ रनमा आउट भए । लगतै अर्को बलमा नभोद दिनुश्रीले भिम सार्कीलाई १ रनमा एलवी डब्लू आउट गरेसँगै नेपालको ठूलो योगफलको संभावना सकिएको थियो ।

ओपनर पवन सरार्फ ४ रनमा आउट भए । पाँचौ ओभरको चौथो बलमा दिलसान मदुसनकाले विकेटकीपर कामिल मिश्राबाट पवनलाई क्याच गराए । मदुसनकालेनै सातौं ओभरको पाँचौ बलमा आशिफ शेखलाई ७ रनमा बोल्ड आउट गरे ।

कुशल मल्ल २ रनमा क्याच आउट भए । कमल सिंह ऐरीलाई रोहन सञ्जय शिल्भाले २ रनमा बोल्ड आउट गरे । नेपालको तर्फबाट १ मात्रै छक्का प्रहार गरेका राशिद २२ बलमा १५ रनमा अविजित रहे ।

श्रीलंकाका लागि नभोद दिनुश्रीले ९ ओभरमा २६ रन खर्चेर ३ विकेट लिए । दिल्सान मदुसनकाले पनि ८ ओभरमा १ मेडन सहित २३ रन खर्चेर ३ विकेट लिए । मडानियल र सञ्जयको नाममा समान १ विकेट रह्यो ।