काठमाडौं (हाम्रो खेलकुद) – नेक्सस क्रिकेट एकेडेमीको आयोजनामा हुने एसिएल यू १९ क्रिकेट टि ट्वान्टी प्रतियोगिताको सबै तयारी पुरा भएको बताइएको छ । मुलपानीको माथिल्लो क्रिकेट मैदानमा असोज २ देखी १५ गते चल्ने प्रतियोगितामा देशभरका १६ निजी क्रिकेट एकेडेमीको सहभागिता रहने छ ।

प्रतियोगितामा ओसिस क्रिकेट एकेडेमी काठमाडौं,विराटनगर क्रिकेट एकेडेमी मोरङ,स्वतन्त्र युवा क्रिकेट एकेडेमी बिरगन्ज पर्सा,जय क्रिकेट एकेडेमी महेन्द्रनगर,ग्रेटर हिमायलन क्रिकेट एकेडेमी काठमाडौं,नेक्सस क्रिकेट एकेडेमी ए र बी रहने छन् ।

त्यस्तै वेष्टर्न क्रिकेट एकेडेमी बुटवल,ज्ञानज्योती क्रिकेट एकेडेमी दाङ, पोखरा क्रिकेट एकेडेमी,राईजिङ पोखरा क्रिकेट एकेडेमी ,हिमालयन क्रिकेट एकेडेमी काठमाडौं,नेपाल स्पोर्टस म्यानेजमेन्ट काठमाडौं,एन्जल स्पोर्टस एकेडेमी र काठमाडौं क्रिकेट एकेडेमीको सहभागिता रहने छ ।

१६ टोलीलाई चार समूहमा राखेर प्रतिस्पर्धा गराईने छ । राउन्ड रोविन लिगपछि समूहका शीर्ष २ टोली सेमिफाइनल पुग्नेछन् । तियोगिताको विजेताले १ लाख ५० हजार र दोस्रो हुने टोलीले १ लाख रुपैयाँ प्राप्त गर्नेछ । प्रत्येक खेलको म्यान अफ द म्याचले १ हजार रुपैयाँ प्राप्त गर्ने छन् ।

त्यस्तै प्रतियोगिताका उत्कृष्ट ब्याट्सम्यान,बलर,म्यान अफ द सिरिज र उदयमान खेलाडीलाई पनि आवर्डको व्यवस्था गरिएको छ ।
प्रतियोगिताका उत्कृष्ट ३ खेलाडीले ईपीएलको फे्रन्चाइज टोली काठमाडौं क्रिग्स इलाभेनको टोलीसँग सिधै दोस्रो चरणमा जोडिनेछन् । त्यस्तै उत्कृष्ट चार खेलाडीलाई नेक्सस क्रिकेट एकेडेमी दिल्लीमा ६ महिना निशुल्क प्रशिक्षणको ब्यवस्था गरिएको आयोजकले जनाएको छ ।
अन्य पाँच उत्कृष्ट खेलाडीले काठमाडौंमा रहेको नेक्सस एकेडेमीमा १ वर्ष निशुल्क प्रशिक्षण गर्न पाउने बताइएको छ । प्रतियोगितामा विमाको पनि ब्यवस्था गरिएको छ । प्रतियोगितामा सहभागि खेलाडी तथा अफिसियलहरुको रु ५ लाख रुपैयाँको दुर्घटना विमा गरिएको छ ।