काठमाडौं (हाम्रो खेलकुद) – यसै महिना आयोजना हुने वुमन्स च्याम्पियन्स लिग (डब्लुसिएल) टि ट्वान्टी क्रिकेट प्रतियोगिताको खेल तालिका सार्वजनिक भएको छ । आयोजक क्विन्स इभेन्ट्स म्यानजमेन्ट प्रालिले बुधबार खेल तालिका सार्वजनिक गरेको हो ।

५ टोलीको सहभागितामा डब्लुसिएल असोज २९ देखि कात्तिक ७ गते सम्म कीर्तिपुरस्थित त्रिभुवन विश्वविद्यालयको मैदानमा हुने छ । राउण्ड रोविनको आधारमा हुने प्रतियोगितामा ललितपुर फाल्कोन्स,पोखरा पल्टन,क्याट क्विन्स काठमाडौं,चितवन राइनोज र विराटनगर टाइन्टस गरि ५ टोली छन् ।

उद्घाटन खेल असोज २९ गते क्याट क्विन्स काठमाडौं र चितवन राइनोजबीच हुने बताइएको छ । त्यस्तै असोज ३० गते मा पहिलो खेलमा क्याट क्विन्स काठमाडौं र पोखरा पल्टन तथा दोस्रो खेलमा ललितपुर फाल्कोस र विराटनगर टाइटन्सबीच प्रतिस्पर्धा हुने छ । कात्तिक १ गते पहिलो खेलमा विराटनगर र पोखरा तथा दोस्रो खेलमा चितवन र ललितपुर भिड्ने छन् ।

कात्तिक २ गते मा पोखरा र चितवन तथा दोस्रो खेलमा विराटनगर र काठमाडौंबीच प्रतिस्पर्धा हुने छ । कात्तिक ३ गते पहिलो खेलमा काठमाडौं र ललितपुर तथा दोस्रो खेलमा चितवन र विराटनगर भिड्ने छन् । कात्तिक ४ गते ललितपुर पोखराबीच प्रतिस्पर्धा हुने छ । शीर्ष स्थानमा रहने टोली स्वतः फाइनलमा पुग्ने छ ।

दोस्रो स्थान र तेस्रो स्थानमा रहेका टोलीबीच कात्तिक ५ गते एलिमिनेटर खेल हुने छ । जसको विजेता शीर्ष स्थानमा रहेको टोलीसँग उपाधिको लागि कात्तिक ७ गते भिड्ने छ । दुई खेल हुने दिन बिहान ९ः३० बजे र दिउँसो १ः३० बजे खेल सुरु हुने बताएको छ । उद्घाटन,एलिमिनेटर र फाइनल खेल भने ११ः ३० बजे सुरु हुनेछ ।

राष्ट्रिय महिला टोलीकी सदस्य एवंम् पूर्व कप्तान नेरी थापा ललितपुरकी मार्की खेलाडी हुन् । त्यस्तै पोखरामा सिता रानामगर,काठमाडौंमा राष्ट्रिय टोलीकी कप्तान रुविना क्षेत्री,चितवनमा इन्दु बर्मा र विराटनगरमा सरिता मगर मार्की खेलाडी रहेका छन् ।