काठमाडौं (हाम्रो खेलकुद) – ओमानमा आजबाट सुरु हुने टि ट्वाटी क्रिकेट सिरिज सहभागी ५ मध्ये नेपालबाहेक सबै आइसिसी टि ट्वाटी विश्व कप छनोटको तयारीका रुपमा रहेको छ । यो सिरिज पछि ४ टोली दुबईमा हुने विश्व कप छनोटमा भाग लिन ओमानबाट त्यसतर्फ जानेछन् ।
नेपाल भने सिंगापुरमा गत महिना भएको क्षेत्रिय छनोटबाटै बाहिरिएको थियो । पहिलो दिन शनिबार नेपालको खेल भने छैन । आज आयोजक ओमान र हङकङ तथा आयरल्यान्ड र नेदरल्यान्ड्सबीच प्रतिस्पर्धा हुनेछ । यो सिरिजलाई अन्तर्राष्ट्रिय क्रिकेट परिषद् (आइसिसी) को मान्यता पाएको छ ।
सहभागी ५ टोली नै टि ट्वान्टी मान्यता प्राप्त राष्ट्र भएकाले आइसिसीले सिरिजलाई मान्यता दिएको हो । युवा खेलाडीको बाहुल्यता रहेको नेपाली टोलीले भने यो सिरिजलाई स्वदेशमा मंसिरमा आयोजना हुने १३ औं दक्षिण एसियाली खेलकुद (साग) को तयारीका रुपमा हेरेको छ । साग मंसिर १५ देखि २४ गते सम्म काठमाडौं र पोखरामा हुने तय छ ।
