एजेन्सी – श्रीलंकासँगको तीन टि ट्वान्टी सिरिज घरेलु टोली अष्ट्रेलियाले ३-० ले जित्दै क्लिनस्वीप गरेको छ । तेस्रो तथा अन्तिम खेलमा अष्ट्रेलियाले श्रीलंकालाई ७ विकेटले हराउँदै क्विन स्वीप गरेको हो ।

जितका लागि १ सय ४३ रनको विजयी लक्ष्य अष्ट्रेलियाले १७.४ ओभरमा ३ विकेट गुमाउँदै पुरा गर्यो । अष्ट्रेलियाको जितमा ओपनर डेविड वार्नरले ५७ रनको अविजित इनिङ खेले । वार्नरले चौका प्रहार गर्दै खेल जिताएका थिए । वार्नरले ५० बलमा ४ चौका र १ छक्का प्रहार गरे । ब्यक्तिगत १२ रनमा कप्तान लासिथा मलिङ्गाले क्याच छोडेपछि वार्नरले जीवन दान पाएका थिए । वार्नरले पहिलो खेलमा शतक र दोस्रो खेलमा ६० रनको अविजित इनिङ खेलेका थिए । यो सँगै वार्नरले टि ट्वान्टी आईमा आफ्नो २ हजार रन पनि पुरा गरेका छन् ।

अर्का ओपनर तथा कप्तान आरोन फिन्च २५ बलमा १ चौका र ३ छक्का सहित ३७,स्टिभ स्मिथ १३ रनमा आउट हुँदा एश्टन टर्नर २२ रनमा अविजित रहे । टर्नरले १५ बलमा २ छक्का प्रहार गरे । श्रीलंकाका कप्तान लासिथा मलिङ्गा,लाहिरु कुमारा र नुवान प्रदीपले समान १ विकेट लिए ।

 

त्यसअघि मेलर्बनमा टस हारेर ब्याटिङको निम्तो पाएको श्रीलंकाले निर्धारित २० ओभरमा ६ विकेटको क्षतिमा १ सय ४२ रन बनाएको थियो । श्रीलंकाका लागि विकेटकीपर कुसल परेराले ४५ बलमा ४ चौका र १ छक्का सहित सर्वाधिक ५७ रनको योगदान दिए । पहिलो ओभरको अन्तिम बलमा मिचेल स्टार्कले ओपनर निरोशन डिक्वेलालाई शुन्यमा पेभिलिएन फर्काए । कुशल मेन्डिस १३,अभिष्का फ्रर्नान्डो २०,ओशदा फ्रर्नान्डो ६ रनमा क्याच आउट भए ।

शेहान जयसूर्या १२ रनमा आउट हुँदा भानुका राजपक्षे १७ रनमा अविजित रहे । कप्तान लासिथा मलिङ्गा ४ बलमा १ छक्का सहित ८ रनमा अविजित रहे । अष्ट्रेलियाका केन रिचर्ड्सन, प्याट कमिन्स र मिचेल स्टार्कले समान २ विकेट लिए ।

अष्ट्रेलिया पहिलो खेलमा १ सय ३४ र दोस्रो खेलमा ९ विकेटले विजयी भएको थियो । अष्ट्रेलियाले अव पाकिस्तानसँग तीन टि ट्वान्टी सिरिज घरेलु मैदानमै खेल्ने छ । अष्ट्रेलिया र पाकिस्तानबीच पहिलो टि ट्वान्टी खेल आइतबार सिड्नीमा हुने छ ।