एजेन्सी– पाकिस्तानले एसीसी इमर्जिङ टिम्स एसिया कपको उपाधि जितेको छ । शनिवार फाइनल खेलमा घरेलु टोली बंगलादेशलाई ७७ रनले पराजित गर्दै पाकिस्तानले उपाधि जितेको हो ।

पाकिस्तानले प्रस्तुत गरेको ३ सय २ रनको विशाल विजयी लक्ष्य पछ्याएको बंगलादेश ४३.३ ओभरमा अल आउट हुँदै २ सय २४ रनमा समेटियो । बंगलादेशका लागि अफिफ हुसैनले ५३ बलमा ४ चौका र १ छक्का सहित सर्वाधिक ४९ रनको योगदान दिए ।

मोहम्मद नइम शेख १६, सौम्य सरकार १५, कप्तान नज्मुल सान्तो ४६, यासिर अली २२ र मेहदी हसनले ४२ रन जोड्न बाहेक अन्यले राम्रो प्रर्दशन गर्न सकेनन् । पाकिस्तानका मुहम्मद हसनैनले ३, खुशदील शाह र सैफ बदरले समान २ विकेट लिए ।

त्यसअघि टस हारेर ब्याटिङ थालेको पाकिस्तानले निर्धारित ५० ओभरमा ६ विकेट गुमाउँदै ३ सय १ रन बनाएको थियो । विकेटकीपर रोहेल नाजिरले १ सय ११ बलमा १२ चौका र ३ छक्का सहित १ सय १३ रनको शतकीय इनिङ खेले । त्यस्तै इमरान रफिक ६२, साउद शकिल ४२, हैदर अली खान २६ र खुशदील शाहले २७ रन जोडे । बंगलादेशका सुमन खानले ३, हसन महम्मदले २ र मेहदी हसनले १ विकेट लिए ।

इमर्जिङ कपमा नेपालले पनि सहभागिता जनाएको थियो । समुह बी मा रहेको नेपाल भारतसँग ७ विकेट र बंगलादेशसँग ८ विकेटले पराजित हुँदै समुह चरणबाटै बाहिरिएको थियो । नेपालले हङकङलाई भने ४० रनले हराएको थियो ।