एजेन्सी – विकेटकिपर बिजे वाटलिङले कीर्तिमानी दोहोरो शतक प्रहार गरेपछि इंग्ल्यान्डसँगको पहिलो टेष्टमा घरेलु टोली न्युजिल्यान्डले विशाल योगफल तयार पारेको छ । चौथो दिनको खेल सकिदा न्युजिल्यान्डले २ सय ७ रनको अग्रता कायम राखेको छ । दोस्रो इनिङमा इंग्ल्यान्ड २७.४ ओभरमा ५५-३ को कमजोर अवस्थामा छ ।

चौथो दिनको अन्तिम बलमा मिचेल सान्टनारले ज्याक लेचलाई शून्यमा आउट गरे । जो डेनली ७ रनमा अविजित छन् । ओपनर रोरी बर्न्स ३१ र डोमिनिक शिब्लीलाई १२ रनमा मिचेल सान्टनारले क्याच आउट गराए । न्युजिल्यान्डले २ सय १ ओभरमा ६१५-९ को अवस्थामा पहिलो इनिङ समाप्तीको घोषणा गर्यो ।

न्युजिल्यान्डका विकेटकिपर बिजे वाटलिङले २ सय ५ रनको दोहोरो शतकीय इनिङ खेल्दै कीर्तिमान रचे । न्युजिल्यान्डबाट टेष्टमा विकेटकीपरको रुपमा दोहोरो शतक पुरा गर्ने बिजे पहिलो ब्याट्सम्यान बनेका छन् । दुई सय ओभरको अन्तिम बलमा जोफ्रा आर्चरले
विकेटकिपर जस बटलरबाट क्याच आउट गराउनु अघि वाटलिङले ४ सय ७३ बलमा २४ चौका र १ छक्का प्रहार गरे ।

त्यस्तै आठौं नम्बरमा ब्याटिङ गर्न आएका स्पिनर मिचेल सान्टानरले करिअरकै पहिलो टेष्ट शतक प्रहार गर्दै १ सय २६ रन जोडेपछि न्युजिल्यान्डले विशाल योगफल तयार पारेको हो । साम करनले ओल्ली पोपबाट क्याच आउट गराउनुअघि सान्टनारले २ सय ६९ बलमा ११ चौका र ५ छक्का प्रहार गरे ।

सातौं विकेटका लागि वाटलिङ र सान्टनारले २ सय ६१ रनको साझेदारी गर्दै विशाल योगफल सम्म पुर्याए । जुन न्युजिल्यान्डलाई सातौं विकेटका लागि गरेको हालसम्मकै उच्च साझेदारी हो । तेस्रो दिन अलराउन्डर कोलिन डी गा्रन्डहोम ६५, ओपनर जित रावल १९, टम लाथम ८, कप्तान केन विलियम्सनलाई ५१, रोश टेलर २५ र हेनरी निकोल ४१ रनमा आउट भएका थिए ।

इंग्ल्यान्डका युवा खेलाडी साम करनले ३, ज्याक लेच र बेन स्टोक्सले समान २ विकेट लिए । जोफ्रा आर्चर र कप्तान जो रुटले १-१ विकेट लिए । पहिलो इनिङमा इंग्ल्यान्ड १ सय २४ ओभरमा ३ सय ५३ रनमा अल आउट भएको थियो । अलराउन्डर बेन स्टोक्सले ९१ रनको योगदान दिए ।

स्टोक्सले १ सय ४६ बलमा १२ चौका प्रहार गरे । डेनली ७४, रोरी बर्न्स ५२, ओल्ली पोप २९, विकेटकीपर जस बटलर ४३, साम करन शून्य र जोफ्रा आर्चर ४ रनमा आउट भए । न्युजिल्यान्डका टिम साउथीले ४, निल वाग्रर ३, कोलिन डी ग्राण्डहोम २ र ट्रन्ट बोल्टले १ विकेट लिए ।